როდის უნდა გაუჩნდეს მშობელს ეჭვი, რომ ბავშვი თანატოლებს სიმაღლეში ზრდაში ჩამორჩება და ვის უნდა მიმართოს ასეთ დროს - სპეციალისტი საუბრობს - მშობლები
როდის უნდა გაუჩნდეს მშობელს ეჭვი, რომ ბავშვი სიმაღლეში ზრდაში ჩამორჩება და ვის უნდა მიმართოს ასეთ დროს - სპეციალისტი საუბრობს
როდის უნდა დაეჭვდეს მშობელი, რომ ბავშვი სიმაღლეში საკმარისად არ იზრდება და რას ნიშნავს ზრდის შეფერხება - თემაზე გადაცემაში "მედგიდი" ენდოკრინოლოგი - მაია რეხვიაშვილი საუბრობს:
- ზრდის შეფერხება არის მდგომარეობა, როდესაც ბავშვი ან მოზარდი სიმაღლესა და წონაში იმაზე გაცილებით ნელა იმატებს, ვიდრე ეს მისი ასაკისა და სქესისთვისაა გათვალისწინებული. მშობელი ყურადღებით უნდა იყოს იმ შემთხვევაში, როდესაც მისი შვილი თანატოლებთან შედარებით გაცილებით დაბალია, ან ამჩნევს, რომ წლების განმავლობაში ბავშვი ასაკობრივ განვითარებაში თანატოლებს ნელ-ნელა ჩამორჩება. მშობელი უნდა დაფიქრდეს და დაეჭვდეს მაშინაც, როდესაც რამდენიმე წლის განმავლობაში ბავშვის ტანსაცმლისა თუ ფეხსაცმლის ზომა პრაქტიკულად არ იცვლება. ასევე, დაეჭვდეს იმ შემთხვევაშიც, როდესაც სქესობრივი მომწიფება ვადაზე ადრე დაიწყება, ან პირიქით - პროცესი დაგვიანდება და მეორადი სქესობრივი ნიშნები დროულად არ განვითარდება. ასეთ დროს მშობელმა ყურადღება უნდა გამოიჩინოს და ბავშვი ექიმთან - პედიატრთან ან ბავშვთა ენდოკრინოლოგთან - აუცილებლად მიიყვანოს.
