წვიმის შემდეგ ზღვაში ჩასვლას ნუ იჩქარებთ - როდის ჯობს ზღვა და როდის - აუზი - მშობლები

ზაფხულის ცხელ დღეებში ოჯახების უმეტესობა დროს ზღვაზე ან აუზთან ატარებს. ამ სეზონზე საქართველოში საკმაოდ არამდგრადი ამინდები დაემთხვა, განსაკუთრებით, სანაპირო ზოლში. წვიმებს მზიანი დღეები ენაცვლება, თუმცა წყალი იმღვრევა და ინფექციების გავრცელების თვალსაზრისით, ბანაობა არც თუ ჰიგიენურია. ამ დროს ზღვა უფრო კარგი არჩევანია თუ აუზი?

სპეციალისტების განმარტებით, ერთმნიშვნელოვანი პასუხი არ არსებობს. უსაფრთხოება ბევრად უფრო დამოკიდებულია წყლის ხარისხზე, მოვლასა და ჰიგიენურ პირობებზე.

რატომ გვირჩევენ წვიმის შემდეგ ზღვაში ცოტა ხნით ბანაობისგან თავის შეკავებას?

თუ ძლიერი წვიმა მოვიდა, განსაკუთრებით ქალაქის სანაპიროებთან, სპეციალისტები ხშირად რამდენიმე საათით, ზოგჯერ კი 24 საათამდეც, ზღვაში ბანაობისგან თავის შეკავებას გვირჩევენ.

ამის მიზეზი ის არის, რომ წვიმის წყალს ზღვაში ჩააქვს ქუჩებიდან, მდინარეებიდან და სანიაღვრე სისტემებიდან სხვადასხვა დამაბინძურებელი ნივთიერება და მიკროორგანიზმი. ამის გამო წყალში დროებით შეიძლება გაიზარდოს ბაქტერიების რაოდენობა, რაც კუჭ-ნაწლავის ინფექციების, თვალის, ყურისა და კანის გაღიზიანების რისკს ზრდის.

თუ წვიმა ხანმოკლე იყო და სანაპირო აშკარად არ დაბინძურებულა, რისკი გაცილებით ნაკლებია. თუმცა ძლიერი წვიმის შემდეგ, განსაკუთრებით მაშინ, როცა ზღვის წყალი დამღვრიეულია ან ახლომახლო მდინარე ზღვას უერთდება, სიფრთხილის გამოჩენა ნამდვილად ღირს.

განსაკუთრებული ყურადღება უნდა მიაქციონ მცირეწლოვანი ბავშვების, ორსულებისა და სუსტი იმუნიტეტის მქონე ადამიანების მშობლებმა, რადგან ისინი ნაწლავური ინფექციების მიმართ უფრო მგრძნობიარენი არიან.

ზღვა – ბუნებრივი გარემო, მაგრამ რისკები აქაც არსებობს

ზღვის მარილიანი წყალი ზოგიერთი მიკროორგანიზმის გამრავლებას ნამდვილად აფერხებს, თუმცა ეს იმას არ ნიშნავს, რომ ზღვა ყოველთვის სტერილურია.

დაბინძურებულ სანაპიროებთან, კანალიზაციის ჩადინების ადგილებთან ან ძლიერი წვიმის შემდეგ წყალში შესაძლოა მოხვდეს ბაქტერიები და სხვა მიკროორგანიზმები, რომლებიც კუჭ-ნაწლავის ინფექციებს, კანის ან ყურის პრობლემებს იწვევს.

განსაკუთრებით მნიშვნელოვანია, ბავშვებმა ზღვის წყალი არ გადაყლაპონ.

აუზი უსაფრთხოა მხოლოდ მაშინ, როცა სწორად არის მოვლილი

კარგად მოვლილი აუზი, სადაც ქლორის დონე და წყლის ფილტრაცია მუდმივად კონტროლდება, ინფექციების გავრცელების თვალსაზრისით ძალიან უსაფრთხოა.

თუმცა, პრობლემა მაშინ ჩნდება, როდესაც:

ქლორის დონე არასაკმარისია

თუ წყალი სათანადოდ არ მუშავდება, მიკრობები უფრო ადვილად მრავლდება.

აუზში ბევრი ადამიანი ბანაობს

რაც უფრო დიდია დამსვენებელთა რაოდენობა, მით უფრო იზრდება წყალში მიკროორგანიზმების მოხვედრის ალბათობა.

ჰიგიენის წესები არ სრულდება

თუ ადამიანები აუზში შესვლამდე შხაპს არ იღებენ ან წყალში ავადმყოფობის დროსაც შედიან, ინფექციების გავრცელების რისკი იზრდება.

რომელი ინფექციები გვხვდება ყველაზე ხშირად?

როგორც ზღვაში, ისე აუზში შესაძლებელია გავრცელდეს:

• ნაწლავური ინფექციები;
• გარეთა ყურის ანთება („მოცურავის ყური“);
• კონიუნქტივიტი;
• კანის ზოგიერთი ინფექცია.

აუზებში, სადაც ჰიგიენა არასათანადოდაა დაცული, ზოგჯერ სოკოვანი ინფექციების გავრცელების რისკიც უფრო მაღალია, განსაკუთრებით საერთო საშხაპეებსა და გასახდელებში.

როგორ შევამციროთ რისკი?

ბანაობის შემდეგ აუცილებლად მიიღეთ შხაპი, გამოიცვალეთ სველი საცურაო კოსტიუმი და კარგად გაიმშრალეთ ყურები. ბავშვებს აუხსენით, რომ წყალი არ უნდა გადაყლაპონ, ხოლო თუ სხეულზე ღია ჭრილობა აქვთ, ბანაობისგან დროებით თავი შეიკავონ.

თუ წყალს უსიამოვნო სუნი აქვს, აშკარად მღვრიეა ან სანაპიროზე დაბინძურების ნიშნები შეინიშნება, ასეთ ადგილას ბანაობა არ არის რეკომენდებული.

საბოლოოდ – ზღვა თუ აუზი?

თუ ზღვის წყალი სუფთაა და სანაპირო ეკოლოგიურად უსაფრთხოა, ზღვა ინფექციების გავრცელების თვალსაზრისით ხშირად უფრო უსაფრთხო გარემოდ მიიჩნევა, რადგან წყალი მუდმივად მოძრაობს და ბუნებრივად განახლდება.

თუმცა, კარგად მოვლილი და სათანადოდ დეზინფიცირებული აუზიც უსაფრთხო არჩევანია.

საბოლოოდ, მთავარი არა ის არის, ზღვაში ბანაობთ თუ აუზში, არამედ რამდენად სუფთაა წყალი და რამდენად იცავთ პირად ჰიგიენას. სწორედ ეს ფაქტორები განსაზღვრავს ინფექციის რისკს ყველაზე მეტად.

როგორც კი დიარეაგადატანილი ადამიანი აუზში შხაპის მიღების გარეშე ჩავა, მის გარშემო მყოფი ყველა რისკის ქვეშ აღმოჩნდება. მცირე რაოდენობის წყლის გადაყლაპვაც კი შეიძლება სერიოზული ინფექციის წყაროდ იქცეს - ივანე ჩხაიძე