"მე არავის არაფერს ვაბრალებ, მაგრამ... ვიღაცას ძალიან არ უნდა, რომ პასუხი აგოს იმ დანაშაულისთვის, რომელიც აშკარად არის ჩადენილი" - გურამ დადიანიძის დედის ადვოკატი - მშობლები
"მე არავის არაფერს ვაბრალებ, მაგრამ... ვიღაცას ძალიან არ უნდა, რომ პასუხი აგოს იმ დანაშაულისთვის, რომელიც აშკარად არის ჩადენილი" - გურამ დადიანიძის დედის ადვოკატი
17 წლის გურამ დადიანიძის გაუჩინარებასთან დაკავშირებით საზოგადოება კვლავ ელის კითხვებზე პასუხებს. ბოლო დღეებში საქმეზე ყურადღება კიდევ ერთხელ გამახვილდა მას შემდეგ, რაც შინაგან საქმეთა სამინისტრომ გამოძიების ფარგლებში ახალი საგამოძიებო მოქმედებების შესახებ გაავრცელა ინფორმაცია.
გურამ დადიანიძის დედის ადვოკატი ტარიელ კაკაბაძე პოდკასტში "შენი ამბავი თაიასთან" ამბობს, რომ საქმის ირგვლივ არსებული გარემოებები და დაკარგული მოზარდის ოჯახის ზოგიერთი წევრის დამოკიდებულება მას დამატებით კითხვებს უჩენს. მისი თქმით, განსაკუთრებით გაუგებარია, რატომ არ ინტერესდებიან ისინი გამოძიების ახალი მასალებით და რატომ არ ცდილობენ მასთან კომუნიკაციას.
„ძალიან საეჭვოა ზოგადად ის, რომ ამდენი ადამიანი — მამა, მამიდა და სხვები — არიან ჩუმად ან ისე იქცევიან, თითქოს არაფერი მომხდარა. ისე იქცევიან, თითქოს გურამი არის უბრალოდ სადმე დასასვენებლად წასული და ძალიან მალე დაბრუნდება უკან.
ხანდახან, როდესაც მე ამ ადამიანებს ვუსმენ, მექმნება შთაბეჭდილება, რომ გურამ დადიანიძე ჩვენთან ერთად არის და ჩვენ ყველანი გავგიჟდით და არ ვიცით, რას ვაკეთებთ და ვის ვეძებთ. როგორ შეიძლება, ასე მშვიდად იყო ადამიანი, რომლის ოჯახის წევრი, 17 წლის ბავშვი, 12 წელია დაკარგულია და არ ვიცით, სად არის, გაუჩინარებულია?
კიდევ ერთხელ ვიმეორებ, რომ მე თავად მქონდა მამიდასთან შეხვედრის მცდელობა და ამ ადამიანმა არ ისურვა ჩემთან შეხვედრა. ამის შემდეგაც ამ ადამიანს ჩემთვის არ დაურეკავს, არ მოუწერია. არც მამას ჩემთვის არ დაურეკავს, არ მოუწერია და არავის გამოუთქვამს სურვილი, რომ შემხვედროდა და თუნდაც კითხვები დაესვა საქმის იმ ახალ მასალებთან დაკავშირებით, რაზეც შინაგან საქმეთა სამინისტრომ გააკეთა განცხადება რამდენიმე დღის უკან.
ხომ თქვა შინაგან საქმეთა სამინისტრომ, რომ ახალი მტკიცებულებები გვაქვს, ახალი გამოკითხვის ოქმები გვაქვს. ხომ უნდა დაინტერესებული იყვნენ ეს ადამიანები, რას ამბობენ მოწმეები, იქნებ ვინმემ რაღაც მნიშვნელოვანი ინფორმაცია გააჟღერა.
სწორედ ჩემთან უნდა ჰქონოდათ კომუნიკაცია, ვინაიდან გამომძიებელი მათ პირდაპირ ამ ინფორმაციას არ მიაწვდიდა. შესაბამისად, როდესაც მე ვხედავ, რომ ამ ადამიანებს ინტერესი არ გააჩნიათ, ეს დამატებით გარკვეულ შეკითხვებს ნამდვილად მიჩენს. მე არავის არაფერს ვაბრალებ, მაგრამ კითხვებს აჩენს.
ასევე ვხედავ, ძალიან ბევრი ყალბი ექაუნთიდან, ყალბი ანგარიშიდან ავრცელებენ სხვადასხვა ცრუ ინფორმაციას და ყველანი კარგად ვხვდებით, რომ ამ ცრუ ინფორმაციის გავრცელების მიზანი არის, რომ ჩვენ შეგვიყვანონ შეცდომაში. „დედა, ცოცხალი ვარ, ცოცხალი“ — ჩვენ ვხედავთ კომენტარებს: „დედა, ცოცხალი ვარ“ და ასე შემდეგ. რა თქმა უნდა, მათი მიზანი არის, რომ ჩვენ გადავერთოთ სხვა საკითხებზე, ჩვენ დავკარგოთ ტემპი, ჩვენ დავკარგოთ დრო.
ისმის კითხვა: რა ინტერესი აქვთ, რომ შეცდომაში შევყავართ? რა ინტერესი აქვთ და, თუ ინტერესი არ აქვთ, მაშინ ამას რატომ აკეთებენ?
აქ კიდევ ერთხელ ჩნდება ის ეჭვები, რომელ ეჭვებზეც ჩვენ ვსაუბრობთ მთელი ამ დღეების განმავლობაში, რომ სავარაუდო დანაშაულს აქვს ადგილი და ვიღაცას ძალიან არ უნდა, რომ მოხდეს აღნიშნული დანაშაულის გამოძიება. ვიღაცას ძალიან არ უნდა, რომ პასუხი აგოს იმ დანაშაულისთვის, რომელიც აშკარად არის ჩადენილი.
სხვანაირად ეს წინააღმდეგობები არ გაჩნდებოდა, სხვანაირად ეს დისკრედიტაციის მცდელობები ნამდვილად არ იქნებოდა და ყველანი გავერთიანდებოდით.“ - ამბობს ტარიელ კაკაბაძე.
