ქალმა კლავიატურა ამოისვირინგა ხელზე, რომ მისმა შვილმა აუტიზმის დიაგნოზით, ყოველთვის შეძლოს მასთან კომუნიკაცია - დედაშვილობის საოცარი ამბავი - მშობლები
ქალმა კლავიატურა ამოისვირინგა ხელზე, რომ მისმა შვილმა აუტიზმის დიაგნოზით, ყოველთვის შეძლოს მასთან კომუნიკაცია - დედაშვილობის საოცარი ამბავი
კანადელი ჯესიკა ფლეტჩერის ამბავი მსოფლიომ გაიგო. ის 11 წლის ბიჭს ზრდის, რომელსაც აუტიზმის ისეთი ფორმა აქვს, ვერბალური კონტაქტი არ შეუძლია და სპეციალური მოწყობილობის მეშვეობით (AAC — დამხმარე/ალტერნატიული კომუნიკაციის მოწყობილობა) ურთიერთობს გარშემო მყოფებთან.
თუმცა ერთხელაც, რესტორანში ყოფნისას, მოწყობილობა გამოირთო (ბატარეა დაუჯდა) და ბიჭს ქაღალდზე დახატული კლავიატურის გამოყენება მოუწია. სწორედ მაშინ გადაწყვიტა ჯესიკამ, რომ ასეთი კლავიატურა მუდმივად ექცია - ხელზე გაიკეთა ტატუს სახით. ახლა ჰანტერს შეუძლია, საჭირო ასოები თითით უჩვენოს, სიტყვები და ფრაზები შეადგინოს. ტატუზე "კი", "არა", "მიყვარხარ" ღილაკებიცაა და ემოციების გამომხატველი გამოსახულებებიც. ეს არის მიგნება, რათა ბავშვს ყოველთვის ჰქონდეს საშუალება, მას მოუსმინონ და გაუგონ.
ჰანტერი ტატუირებულ კლავიატურას რეალურად იყენებს. გავრცელებული ცნობების მიხედვით, პირველი სიტყვა, რომელიც მან დედის ხელზე „აკრიფა“, იყო „Mama“.
საინტერესო დეტალია ისიც, რომ ტატუ მხოლოდ მოწყობილობის გაფუჭების „სათადარიგო ვარიანტი“ არ არის: ის საშუალებას აძლევს ჰანტერს დედასთან ჩუმად და პირადად იურთიერთოს, მაშინ როცა მისი ელექტრონული მოწყობილობა შერჩეულ სიტყვებს ხმამაღლა წარმოთქვამს.
ტექნიკურად, რა თქმა უნდა, ტატუ არ ცვლის AAC მოწყობილობას. ეს არის დამატებითი, ძალიან მარტივი საკომუნიკაციო საშუალება — განსაკუთრებით მაშინ, როცა მოწყობილობა მიუწვდომელია, წყალში ყოფნისას, გარეთ და ა.შ.
