ჰოლივუდში ერთად გაზრდილი ორი და, ორი ვარსკვლავი და ორი საუკეთესო მეგობარი - დაკოტა და ელ ფენინგები - მშობლები
ჰოლივუდში ერთად გაზრდილი ორი და, ორი ვარსკვლავი და ორი საუკეთესო მეგობარი - დაკოტა და ელ ფენინგები
ჰოლივუდში ბავშვობიდან მოხვედრა ერთია, იქ გაზრდა — სრულიად სხვა. კიდევ უფრო იშვიათია შემთხვევა, როდესაც ორი და თითქმის ერთდროულად აღმოჩნდება კამერების წინ, წლების შემდეგ კი ბავშვობის წარმატებას დამოუკიდებელ და განსხვავებულ კარიერად აქცევს. დაკოტა და ელ ფენინგები სწორედ ასეთი დები არიან — ორი მსახიობი, რომლებმაც პოპულარობა ჯერ კიდევ ბავშვობაში მოიპოვეს და შემდეგ საკუთარი სახელები ერთმანეთისგან დამოუკიდებლად დაამკვიდრეს.
დღეს ისინი უკვე მხოლოდ ცნობილი დები აღარ არიან. კოლეგები, პროდიუსერები და ერთმანეთის ყველაზე მნიშვნელოვანი მხარდამჭერები არიან. მათი ისტორია კი იმაზე მეტია, ვიდრე ჰოლივუდური ზღაპარი ორი წარმატებული დის შესახებ.
ყველაფერი უფროსი დისგან დაიწყო
დაკოტა ფენინგი 1994 წელს დაიბადა ჯორჯიის შტატში. მსახიობობა მისი ბავშვობის გეგმად თავიდანვე არ ყოფილა. კარიერაში პირველი ნაბიჯი ხუთი წლის ასაკში გადადგა, როდესაც სარეკლამო რგოლში გამოჩნდა. შემდეგ სატელევიზიო როლები მოჰყვა და ძალიან მალე კინოს სამყაროშიც აღმოჩნდა.
2001 წელს ფილმმა I Am Sam პატარა დაკოტას მიმართ საერთაშორისო ყურადღება კიდევ უფრო გაზარდა. სწორედ ამ ფილმთან არის დაკავშირებული მისი უმცროსი დის, ელ ფენინგის პირველი კინოროლიც — ელმა დაკოტას პერსონაჟის პატარა ვერსია განასახიერა.
ელ ფენინგი 1998 წელს დაიბადა და ბავშვობიდანვე გაიზარდა დის გვერდით, რომელიც უკვე ჰოლივუდში ცნობილი სახე იყო. მოგვიანებით ელმაც დამოუკიდებელი გზა აირჩია და ნელ-ნელა დაამტკიცა, რომ ის მხოლოდ „დაკოტას პატარა და“ არ იყო.
მიუხედავად იმისა, რომ ორივეm მსახიობობა ბავშვობიდან დაიწყო, მათი კარიერული გზები ერთმანეთისგან საკმაოდ განსხვავებულია.
დაკოტა განსაკუთრებით ცნობილი გახდა ისეთი ფილმებით, როგორებიცაა I Am Sam, War of the Worlds, The Runaways, The Twilight Saga და Once Upon a Time in Hollywood. მის კარიერაში ხშირად გვხვდება რთული და დრამატული პერსონაჟები, რომლებმაც მას საშუალება მისცა, ბავშვი ვარსკვლავიდან სერიოზულ მსახიობად ჩამოყალიბებულიყო.
ელ ფენინგმა კი საკუთარი სახელი განსაკუთრებით ისეთი ნამუშევრებით გაითქვა, როგორებიცაა Somewhere, Super 8, Maleficent და The Great. კეტრინ დიდის როლმა The Great-ში მას კიდევ ერთი მნიშვნელოვანი ეტაპი მოუტანა — ელმა არა მხოლოდ მთავარი როლი შეასრულა, არამედ პროექტის აღმასრულებელი პროდიუსერის ფუნქციაც აიღო.
დებს არაერთხელ უსაუბრიათ იმაზე, რომ ერთმანეთის წარმატება მათთვის საფრთხე არასდროს ყოფილა. პირიქით, ორივე ღიად საუბრობს ერთმანეთის მიმართ განსაკუთრებულ სიახლოვესა და მხარდაჭერაზე. დაკოტას თქმით, არ არსებობს ადამიანი, რომლის წარმატებაც მას ელზე მეტად გაუხარდება.
ელიც ხშირად აღნიშნავს, რომ უფროსი დისგან ბევრი რამ ისწავლა. მათი ურთიერთობა ბავშვობიდანვე განსაკუთრებული იყო — ისინი სახლში ერთად თამაშობდნენ, იგონებდნენ სცენებს და სხვადასხვა პერსონაჟს ასახიერებდნენ, სანამ ეს ყველაფერი პროფესიულ კარიერად იქცეოდა.
2021 წელს დაკოტამ და ელმა კიდევ ერთი მნიშვნელოვანი ნაბიჯი გადადგეს და შექმნეს საკუთარი საპროდიუსერო კომპანია Lewellen Pictures. კომპანიის მიზანი მხოლოდ ფილმებში თამაში არ ყოფილა — დებს სურდათ, თავად მიეღოთ მონაწილეობა იმ ისტორიების შექმნაში, რომელთა მოყოლაც საინტერესო იყო მათთვის.ეს მათი კარიერის ბუნებრივი გაგრძელება აღმოჩნდა.
წლების განმავლობაში ფანები ელოდნენ, როდის ითამაშებდნენ დაკოტა და ელ ფენინგები ერთ ფილმში მთავარ როლებს.
ეს მომენტი The Nightingale-თან დაკავშირებულმა პროექტმა მოიტანა. ფილმი კრისტინ ჰანას ამავე სახელწოდების რომანის ეკრანიზაციაა და მეორე მსოფლიო ომის პერიოდში განვითარებულ ისტორიას მოგვითხრობს. დაკოტა და ელ ფენინგები ფილმში დების როლებს ასრულებენ და პროექტის პროდიუსერებიც არიან. ფილმის დაგეგმილი პრემიერა 2027 წლის 19 მარტია.
სიმბოლურია, რომ მათი პირველი დიდი საერთო ეკრანული პროექტი სწორედ დების ისტორიას ეხება.ისინი, რომლებმაც რეალურ ცხოვრებაში ერთმანეთის გვერდით გაატარეს ბავშვობა, ახლა ეკრანზე სხვა დების ისტორიას აცოცხლებენ.
Vanity Fair-თან საუბრისას დაკოტამ თქვა, რომ ელთან ურთიერთობა მისთვის უსაფრთხოებისა და სიმშვიდის ერთ-ერთი მთავარი წყაროა — თუ მის ცხოვრებაში ყველა სხვა ადამიანი გაქრებოდა, მაინც ეცოდინებოდა, რომ და გვერდით ეყოლებოდა.
.jpg)
.jpg)
.jpg)
განსხვავებული პირადი ცხოვრება
ელ ფენინგი 2023 წლიდან ურთიერთობაშია გუს ვენერთან, მედიის აღმასრულებელთან და Rolling Stone-ის ხელმძღვანელთან. მათი ურთიერთობა პირველად 2023 წლის ბოლოს გახდა საჯარო, ხოლო 2024 წლის ოქროს გლობუსზე წყვილი ერთად გამოჩნდა წითელ ხალიჩაზე.
2026 წლის ინტერვიუში ელმა ვენერზე თქვა, რომ ის მის ცხოვრებას „აბალანსებს“ და პერიოდულად გეგმავს მათთვის პატარა მოგზაურობებსა და დასვენებებს. განსაკუთრებით საინტერესოა, რომ ელმა აღნიშნა: გუსი მისთვის უკვე თითქმის ოჯახის წევრივითაა — ის ძალიან კარგად მიიღეს დაკოტამაც და დედამაც.
მანამდე ელს ხანგრძლივი ურთიერთობა ჰქონდა მსახიობ მაქს მინგელასთან. მათი რომანი დაახლოებით 2018–2023 წლებში გაგრძელდა, თუმცა წყვილი ურთიერთობას დიდწილად პირად სივრცეში ინარჩუნებდა.
დაკოტა პირად ცხოვრებაზე გაცილებით ნაკლებს საუბრობს. სწორედ ამიტომ, მის ამჟამინდელ რომანტიკულ სტატუსზე დადასტურებული საჯარო ინფორმაცია ძალიან მწირია.
მისი ცნობილი ურთიერთობებიდან ერთ-ერთი იყო ბრიტანელ მოდელ ჯეიმი სტრაჩანთან — ისინი 2013–2016 წლებში ხვდებოდნენ. მოგვიანებით დაკოტა ჰენრი ფრაისთან დააკავშირეს, თუმცა მათი ურთიერთობის შესახებ თავად დაკოტას არასდროს უთქვამს და 2018 წლის შემდეგ ერთად საჯაროდ თითქმის აღარ გამოჩენილან.
2025 წლის Vanity Fair-ის სტატიაში დაკოტა და ელი ხუმრობდნენ დაკოტას პირად ცხოვრებაზე. ელმა დას უთხრა, რომ შესაძლოა მისი მომავალი ქმარი გაცნობის აპლიკაციაში ყოფილიყო, რაზეც დაკოტამ ხუმრობით უპასუხა, რომ იქ ასეთი ადამიანი ნამდვილად არ ჩანდა.
