"ძმებს გამორჩეული ურთიერთობა ჰქონდათ და მათი შვილებიც დღეს ვართ ოთხი და... ჯანო ბევრს დღესაც მამაჩემი ჰგონია... მამა და ჯანო გაიზარდნენ იქ, სადაც ახლა რუსთაველის მეტროს დიდი სადგურია... მერე ყაზბეგზე გადაიყვანეს..." - ლიზა ბაგრატიონი ცნობილ წინაპრებზე - მშობლები
"ძმებს გამორჩეული ურთიერთობა ჰქონდათ და მათი შვილებიც დღეს ვართ ოთხი და... ჯანო ბევრს დღესაც მამაჩემი ჰგონია... მამა და ჯანო გაიზარდნენ იქ, სადაც ახლა რუსთაველის მეტროს დიდი სადგურია... მერე ყაზბეგზე გადაიყვანეს..." - ლიზა ბაგრატიონი ცნობილ წინაპრებზე
ლიზა ბაგრატიონმა "იმედის დღეში" სტუმრობისას გაიხსენა ცნობილი ბიძა - სპორტსმენი, ოლიმპიური კომიტეტის ხელმძღვანელი და თბილისის კოლორიტი ჯანო ბაგრატიონი და მამა - გიორგი (ტოტოშა) ბაგრატიონი, რომელიც ასევე იყო ქალაქის გამორჩეული კოლორიტი. ძმებს განსაკუთრებული ურთიერთობა ჰქონდათ და მათი შვილებიც ფაქტობრივად ერთად იზრდებოდნენ. ლიზა ბაგრატიონი არაერთხელ მდგარა სცენაზე ბიძასთან ერთად, რომელიც ასევე შესანიშვანად მღეროდა.
ლიზა ბაგრატიონი:
- ჩვენთვის, შვილებისთვის, ამ ორი ძმის ურთიერთობა, ის სიყვარული, რომელშიც ჩვენ გავიზარდეთ, ის რაღაცა წარმოუდგენელი თანადგომა ერთმანეთის, მეგობრების, ოჯახების, არ ვიცი, ჩემთვის ღირსებების აკადემია იყო, რომელიც არ ისწავლება ალბათ, ამას უნდა ვუყურებდე, ამაში უნდა გაიზარდო და ეს არის ის ყველაზე მნიშვნელოვანი და მთავარი. ჩვენ ოთხნი ვართ, მათი შვილები და ჩვენ ასე ვამბობთ, რომ ჩვენ ვართ ოთხი და. ასე გაიზარდენ ძმები, ასეთი ურთიერთობა ჰქონდათ, ერთმანეთის გარეშე იყო წარმოუდგენელი მათი ყოფა.
ბიძაჩემი ჯანო ბევრს ჩემი მამა ჰგონია. აღარც ვაპროტესტებ, იმიტომ რომ ასე გაგვზარდეს, დიახაც იყოს ჯანო ჩემი მამა, საწინააღმდეგო არა მაქვს, არც ჯანო იქნებოდა წინააღმდეგი და არც მამაჩემი. მე და მამა როდესაც ერთად სადღაც შევსულვართ, თუნდაც მაღაზიაში და ვიღაცას უთქვამს, მე ისე მიყვარს თქვენი მამა, ისე მომიჭერდა ხოლმე ხელზე მამაჩემი, არ თქვა, რომ მე ვარ შენი მამაო... იმიტომ, რომ ეს რაღაცა ჩვეულებრივი ამბავი იყო. მამაც აპროტესტებდა საჯაროდ ინტერვიუებში, ტელევიზიაში გამოჩენას. არადა მაშინ, ახალგაზრდობაში, მინდოდა ხანდახან, მამაც გამოჩენილიყო ჩემ გვერდით ინტერვიუში.
