თბილისში ექიმებმა პაციენტს თვალბუდიდან დაახლოებით 2,5 სანტიმეტრი სიგრძის ცოცხალი პარაზიტი ამოუყვანეს. პაციენტმა სამედიცინო დაწესებულებას თვალის ტკივილის გამო მიმართა და თავდაპირველად ვერც კი წარმოიდგენდა, რომ დისკომფორტის მიზეზი პარაზიტული ინფექცია შეიძლებოდა ყოფილიყო. შემთხვევის შესახებ ტელეკომპანია „რუსთავი 2“ იუწყება.

სიუჟეტის მიხედვით, პაციენტს თვალის კუთხეში ტკივილი დაეწყო. თავდაპირველად სიმპტომი განსაკუთრებულ ყურადღებას არ იპყრობდა, თუმცა რამდენიმე დღეში ექიმთან მისვლა გადაწყვიტა.

„ერთ დილით, უბრალოდ, მეტკინა თვალის რაღაც კუთხე, ტკივილი ვიგრძენი. ორ-სამ დღეში მოვედი ქალბატონ მედეასთან, შევამოწმეთ და აღმოჩნდა ეს პარაზიტი“, — იხსენებს პაციენტი.

გამოკვლევისას ექიმებმა თვალბუდეში კაფსულირებული წარმონაქმნი აღმოაჩინეს. თავდაპირველად მას სხვა დაავადებებისთვის დამახასიათებელი ნიშნებიც ჰქონდა, თუმცა ოფთალმოლოგმა იშვიათი პარაზიტული ინფექციის შესაძლებლობაც განიხილა.

საბოლოოდ დადგინდა, რომ საქმე დიროფილარიას — პარაზიტულ ჭიას — ეხებოდა, რომელიც ადამიანის ორგანიზმში ინფიცირებული კოღოს ნაკბენით შეიძლება მოხვდეს.

პაციენტს ოპერაცია ჩაუტარდა, რომელიც დაახლოებით ორ საათს გაგრძელდა. ექიმებმა თვალბუდიდან ცოცხალი პარაზიტი ამოიყვანეს.

„დაახლოებით 2,5 სანტიმეტრი იყო. ორგანიზმმა თვითონ დამცავი იმუნური კაფსულა გააკეთა და არ მისცა საშუალება, რომ წასულიყო, ვთქვათ, იქით, უფრო ტვინისკენ. ცოცხალი წავიყვანეთ პარაზიტოლოგიაში“, — ამბობს სიუჟეტში ექიმი.

რა არის დიროფილარია და როგორ ხვდება ადამიანის ორგანიზმში?

დიროფილარია პარაზიტული მრგვალი ჭიაა, რომელიც ძირითადად ცხოველებში, განსაკუთრებით ძაღლებში, გვხვდება. მისი ზოგიერთი სახეობა ადამიანშიც იწვევს ინფექციას, რომელსაც დიროფილარიოზი ეწოდება.

ინფექციის გადამტანი კოღოა. როდესაც კოღო ინფიცირებულ ცხოველს კბენს, მას შეუძლია პარაზიტის ლარვები მიიღოს და შემდგომი ნაკბენისას სხვა ორგანიზმში გადაიტანოს.

ადამიანში მოხვედრის შემდეგ ლარვა შეიძლება კანქვეშა ქსოვილებში განვითარდეს და ზოგჯერ თვალის მიდამოშიც აღმოჩნდეს.

დიროფილარიოზი ადამიანებში შედარებით იშვიათია. ინფექციამ შესაძლოა გამოიწვიოს კანქვეშა კვანძი, შეშუპება, ტკივილი ან მოძრავი წარმონაქმნის შეგრძნება. თვალის მიდამოში პარაზიტის არსებობისას სიმპტომები დამოკიდებულია მის ზუსტ მდებარეობაზე.

ზოგიერთ შემთხვევაში ინფიცირებულ ადამიანს ხანგრძლივი პერიოდის განმავლობაში გამოხატული სიმპტომები საერთოდ არ აქვს.

კაცს თავის ტვინში ჭია აღმოუჩინეს, რომელიც ცუდად მოხარშული ხორცისგან გადაედო - რა დაადგინეს ამერიკელმა ექიმებმა

როგორ მივხვდეთ, რომ ბავშვს ჭია ჰყავს: სიმპტომები ზოგადი და მრავალფეროვანია