კბილების კრაჭუნი ძილში ან სიფხიზლეში - საჭიროა თუ არა ბავშვის გაღვიძება ამ დროს, რას აზიანებს და როდის არის საჭირო ექიმი - მშობლები

ბევრ მშობელს შეუმჩნევია, რომ ბავშვი ძილის დროს კბილებს აკრაჭუნებს. ზოგჯერ ხმა იმდენად ძლიერია, რომ მშობელს აღვიძებს და აშინებს. გავრცელებული მოსაზრების თანახმად, ღამით კბილების კრაჭუნი ორგანიზმში პარაზიტების არსებობაზე მიუთითებს. თუმცა, სინამდვილეში ამ მოვლენას მრავალი შესაძლო მიზეზი აქვს და პარაზიტებთან მისი პირდაპირი კავშირი მეცნიერულად დადასტურებული არ არის.

მედიცინაში კბილების უნებლიე კრაჭუნს ან ძლიერ დაჭერას ბრუქსიზმი ეწოდება. ის შეიძლება გამოვლინდეს როგორც ძილის დროს, ისე სიფხიზლეში. ბავშვებში ბრუქსიზმი საკმაოდ გავრცელებულია, განსაკუთრებით სარძევე კბილების ამოსვლისა და მათი მუდმივი კბილებით ჩანაცვლების პერიოდში.

უმეტეს შემთხვევაში ბრუქსიზმი სერიოზულ პრობლემას არ წარმოადგენს და ასაკის მატებასთან ერთად თავისთავად მცირდება. თუმცა, თუ ბავშვი კბილებს ხშირად და ძლიერად აკრაჭუნებს, მნიშვნელოვანია მიზეზების გარკვევა, რადგან ხანგრძლივმა ბრუქსიზმმა შესაძლოა კბილების დაზიანება და სხვა უსიამოვნო სიმპტომები გამოიწვიოს.

რატომ კრაჭუნებს ბავშვი კბილებს ძილში?

ბრუქსიზმის გამომწვევი ერთი კონკრეტული მიზეზი არ არსებობს. მის განვითარებაში შეიძლება მონაწილეობდეს ძილის თავისებურებები, ნერვული სისტემის აქტივობა, ემოციური მდგომარეობა და სხვა ფაქტორები.

• სტრესი და ემოციური დაძაბულობა

• კბილების ამოსვლა და თანკბილვის ცვლილებები

• ძილის დარღვევები

• ნერვული სისტემის თავისებურებები

• მემკვიდრეობითი ფაქტორები

  

  მართალია, რომ ბავშვი კბილებს ჭიების გამო აკრაჭუნებს?

  ეს ერთ-ერთი ყველაზე გავრცელებული მითია.

  ბევრ ოჯახში დღემდე მიაჩნიათ, რომ თუ ბავშვი ღამით კბილებს აკრაჭუნებს, აუცილებლად პარაზიტებზე უნდა შემოწმდეს.

  სინამდვილეში ბრუქსიზმსა და ნაწლავურ პარაზიტებს შორის პირდაპირი მიზეზობრივი კავშირი დადასტურებული არ არის.

  ზოგიერთ კვლევაში ამ ორ მოვლენას შორის სტატისტიკური კავშირი გამოვლინდა, თუმცა სხვა კვლევებმა მსგავსი შედეგი ვერ დაადასტურა. არსებული სამეცნიერო მონაცემები საკმარისი არ არის იმის დასასკვნელად, რომ პარაზიტები კბილების კრაჭუნს იწვევს.

  ამიტომ მხოლოდ ბრუქსიზმის გამო ბავშვისთვის ჭიების საწინააღმდეგო პრეპარატების მიცემა არ არის გამართლებული.

  პარაზიტულ ინფექციაზე გამოკვლევა საჭიროა მაშინ, როდესაც არსებობს შესაბამისი სიმპტომები ან სხვა სამედიცინო საფუძველი.

რა საფრთხეს უქმნის ბრუქსიზმი ბავშვის ჯანმრთელობას?

• კბილების ცვეთა და მინანქრის დაზიანება

• ყბის კუნთების ტკივილი

• თავის ტკივილი

• საფეთქელ-ქვედაყბის სახსრის პრობლემები

  რა უნდა გააკეთონ მშობლებმა?

  თუ ბავშვი ძილში კბილებს აკრაჭუნებს, პირველ რიგში საჭიროა დაკვირვება. მნიშვნელოვანია გაირკვეს, რამდენად ხშირად ხდება ეს, ახლავს თუ არა სხვა სიმპტომები და ხომ არ შეინიშნება კბილების დაზიანება.

  • მოაწესრიგეთ ძილის რეჟიმი

  • შეზღუდეთ ეკრანები ძილის წინ

  • შეამცირეთ საღამოს ემოციური დატვირთვა

  • დააკვირდით ბავშვის ძილს

  • იზრუნეთ ბავშვის ემოციურ მდგომარეობაზე

    როდის არის აუცილებელი ექიმთან მისვლა?

    ბავშვთა სტომატოლოგთან კონსულტაცია რეკომენდებულია, თუ:

    • ბავშვი კბილებს ხშირად და ძლიერად აკრაჭუნებს;

    • შეიმჩნევა კბილების ცვეთა ან დაზიანება;

    • ბავშვი დილით ყბის ან თავის ტკივილს უჩივის;

    • უჭირს პირის გაღება ან ღეჭვისას დისკომფორტს გრძნობს;

    • კბილები სიცივის ან სიცხის მიმართ მგრძნობიარე გახდა.

    თუ ბრუქსიზმს თან ახლავს ძლიერი ხვრინვა, პირით სუნთქვა ან ძილის დროს სუნთქვის შეჩერების ეპიზოდები, საჭიროა პედიატრთან კონსულტაციაც. ექიმმა შესაძლოა ბავშვი ოტორინოლარინგოლოგთან ან ძილის სპეციალისტთან გადაამისამართოს.

    ნევროლოგის ან ფსიქოლოგის ჩართვა ყველა შემთხვევაში აუცილებელი არ არის. ეს დამოკიდებულია ბავშვის სხვა სიმპტომებსა და ინდივიდუალურ მდგომარეობაზე.

    

    როგორ მკურნალობენ ბრუქსიზმს ბავშვებში?

    ბრუქსიზმის მკურნალობა დამოკიდებულია მის სიმძიმეზე, თანმხლებ სიმპტომებსა და შესაძლო გამომწვევ ფაქტორებზე.

    მსუბუქ შემთხვევებში, როდესაც ბავშვს კბილები არ უზიანდება და სხვა ჩივილები არ აქვს, შესაძლოა მხოლოდ დაკვირვება და პერიოდული სტომატოლოგიური შემოწმება იყოს საკმარისი.

    თუ კბილების ძლიერი ცვეთა აღინიშნება, სტომატოლოგმა შეიძლება დამცავი საშუალებების გამოყენების საკითხი განიხილოს. თუმცა ბავშვებში კაპების გამოყენება ინდივიდუალურად უნდა გადაწყდეს, რადგან გასათვალისწინებელია ყბებისა და კბილების განვითარება.

    თუ გამოვლინდა ძილის დროს სუნთქვის დარღვევა, აუცილებელია შესაბამისი მდგომარეობის შეფასება და მკურნალობა.

    მნიშვნელოვანია ისიც, რომ მაგნიუმის, კალციუმის ან D ვიტამინის დამატებით მიღება ბრუქსიზმის სტანდარტულ მკურნალობას არ წარმოადგენს. მათი დანიშვნა გამართლებულია მაშინ, როდესაც დეფიციტი ან სხვა სამედიცინო ჩვენება არსებობს.

    ასევე არ შეიძლება ბავშვისთვის დამამშვიდებელი პრეპარატების თვითნებურად მიცემა.

    უნდა გავაღვიძოთ თუ არა ბავშვი, როდესაც კბილებს აკრაჭუნებს?

    ჩვეულებრივ, ამის აუცილებლობა არ არსებობს.

    კბილების კრაჭუნის ეპიზოდი ხშირად ხანმოკლეა და თავისთავად სრულდება. ბავშვის გაღვიძება ბრუქსიზმის მკურნალობის ეფექტური მეთოდი არ არის.

    თუ ეპიზოდები ხშირია, ხმამაღალია ან სხვა ჩივილებიც ახლავს, უმჯობესია ექიმთან კონსულტაცია.

    მთავარია გვახსოვდეს,ბავშვებში ღამის ბრუქსიზმი საკმაოდ გავრცელებული მოვლენაა და უმეტესად სერიოზულ დაავადებას არ უკავშირდება. თუმცა თუ კბილების კრაჭუნი ძლიერია, ხანგრძლივად გრძელდება ან ბავშვს ტკივილსა და დისკომფორტს უქმნის, აუცილებელია მიზეზების გარკვევა.

    მხოლოდ კბილების კრაჭუნის საფუძველზე პარაზიტული ინფექციის დიაგნოზის დასმა ან მედიკამენტური მკურნალობის დაწყება არასწორია.

    როგორ მოვაგვაროთ ძილის დარღვევის პრობლემები ბავშვებში

    გვერდზე გადაკიდებული ჩანთა, მოჭერილი ფეხსაცმელი, საღეჭი რეზინის ხშირი გამოყენება, ძილის პოზა - ორთოდონტი განმარტავს, რამ შეიძლება გამოიწვიოს ბავშვებში თანკბილვის დარღვევები