ბევრ წყვილს სურს, რომ ბავშვის დაბადებისას ერთად იყოს, თუმცა ხშირად არც მომავალ დედას და არც მამას ბოლომდე არ აქვს წარმოდგენილი, რა ელოდებათ სამშობიარო ბლოკში. რეალობა შესაძლოა მნიშვნელოვნად განსხვავდებოდეს იმისგან, რასაც ფილმებში ვხედავთ.

მშობიარობა ხანგრძლივი, ფიზიკურად და ემოციურად დატვირთული პროცესია. ამიტომ მამაკაცს, რომელსაც ამ მნიშვნელოვან მომენტში მეუღლის გვერდით ყოფნა სურს, წინასწარი მომზადება სჭირდება.

რა უნდა იცოდეს მომავალმა მამამ, როგორ დაეხმაროს მეუღლეს და რისთვის უნდა იყოს მზად?

რა როლი აქვს მამაკაცს მშობიარობის დროს?

პირველ რიგში, მნიშვნელოვანია იმის გაცნობიერება, რომ მშობიარობაზე მყოფი მეუღლე არც ექიმის ასისტენტია და არც სამედიცინო პერსონალის შემცვლელი. მისი მთავარი მოვალეობა ქალის ემოციური და ფიზიკური მხარდაჭერაა.

ექიმები და ბებიაქალები მუდმივად ვერ იმყოფებიან მშობიარის გვერდით. ისინი პერიოდულად ამოწმებენ მის მდგომარეობას და საჭირო სამედიცინო პროცედურებს ატარებენ. მეუღლეს კი შეუძლია მთელი ამ დროის განმავლობაში მის გვერდით იყოს.

ახლობელი ადამიანის ყოფნა ქალს ხშირად ეხმარება შფოთვის შემცირებაში, თავს უფრო დაცულად აგრძნობინებს და მშობიარობის ხანგრძლივი პერიოდის გადატანას უადვილებს.

თუმცა მხოლოდ დასწრების სურვილი საკმარისი არ არის. სასურველია, წყვილმა წინასწარ გაიაროს ექიმთან გაიაროს ის საკითხები, თუ როგორ მიმდინარეობს მშობიარობა, როგორ უნდა ისუნთქოს ქალმა, რა პოზები შეიძლება დაეხმაროს ტკივილის შემსუბუქებაში და როგორ შეუძლია პარტნიორს მისი მხარდაჭერა.

1. მოამზადეთ შესაბამისი ტანსაცმელი

სამშობიარო ბლოკში ქუჩის ტანსაცმლით შესვლა, როგორც წესი, დაუშვებელია.

მომავალმა მამამ წინასწარ უნდა მოამზადოს სუფთა, კომფორტული ტანსაცმელი და გამოსაცვლელი ფეხსაცმელი, რომლის გარეცხვა და დეზინფექცია ადვილია.

სასურველია, ტანსაცმელი წინასწარ გაირეცხოს, გაუთოვდეს და სუფთა პაკეტში მოთავსდეს.

სამშობიარო ბლოკში მამაკაცს შესაძლოა დასჭირდეს სამედიცინო ქუდი და ნიღაბიც. ზოგიერთ დაწესებულებაში პარტნიორს სპეციალურ ერთჯერად სამოსს აძლევენ.

ტანსაცმლის გამოცვლა უშუალოდ სამშობიაროში, შესაბამის სივრცეში უნდა მოხდეს.

3. მოემზადეთ ხანგრძლივი ლოდინისთვის

ბუნებრივი მშობიარობა ყოველთვის სწრაფად არ მიმდინარეობს. განსაკუთრებით პირველი მშობიარობის შემთხვევაში პროცესი შეიძლება მრავალი საათის განმავლობაში გაგრძელდეს.

პირველი მშობიარობა ზოგჯერ 15–24 საათსაც გრძელდება, თუმცა რეალური ხანგრძლივობა ინდივიდუალურია. შეკუმშვები შეიძლება დღისით დაიწყოს, ბავშვი კი მხოლოდ მეორე დილით დაიბადოს.

ამიტომ მომავალმა მამამ უნდა გაითვალისწინოს, რომ სამშობიაროში საკმაოდ დიდი დროის გატარება მოუწევს.

მნიშვნელოვანია მოთმინება და საკუთარი ძალების სწორად განაწილება. სასურველია, თან ჰქონდეს წყალი, მსუბუქი საკვები და, საჭიროების შემთხვევაში, თერმოსით ჩაი, თუ სამშობიაროს წესები ამის საშუალებას იძლევა.

მშობიარობა შესაძლოა ღამით მიმდინარეობდეს, როდესაც საკვების შეძენა ან კაფეტერიით სარგებლობა რთულია.

4. მშობიარობა რომანტიკული ფილმის სცენას არ ჰგავს

მამაკაცი, რომელიც მეუღლის მშობიარობაზე დასწრებას გადაწყვეტს, მზად უნდა იყოს იმისთვის, რომ რეალობა კინოში ნანახისგან სრულიად განსხვავებული აღმოჩნდება.

ფილმებში ხშირად ვხედავთ, როგორ იწყება შეკუმშვები და რამდენიმე წუთში ბავშვი იბადება. რეალურ ცხოვრებაში მშობიარობა გაცილებით ხანგრძლივი და რთული პროცესია.

ქალს შეიძლება ძლიერი ტკივილი ჰქონდეს, დაიღალოს, გაოფლიანდეს, გაუჭირდეს საუბარი ან საერთოდ არ სურდეს ვინმესთან ურთიერთობა.

მამაკაცს უნდა ესმოდეს, რომ მისი მეუღლე ამ დროს განსაკუთრებულ ფიზიკურ და ემოციურ დატვირთვას განიცდის. მას სჭირდება თანაგრძნობა, მოთმინება და მხარდაჭერა და არა გარეგნობაზე ან ქცევაზე ყურადღების გამახვილება.

5. მამაკაცსაც მოუწევს აქტიური დახმარება

პარტნიორული მშობიარობა არ ნიშნავს იმას, რომ მამაკაცი დერეფანში სკამზე იჯდება და დაელოდება, როდის დაუძახებენ ახალშობილის სანახავად.

მას შეუძლია დაეხმაროს მეუღლეს სწორად სუნთქვაში, მასთან ერთად შეასრულოს სუნთქვითი ვარჯიშები, გაუკეთოს წელისა და გავის მიდამოს მსუბუქი მასაჟი, დაეხმაროს კომფორტული პოზის მიღებაში.

ზოგიერთ ქალს შეკუმშვების დროს მოძრაობა და პოზის შეცვლა უმსუბუქებს მდგომარეობას. სხვებისთვის უფრო სასიამოვნოა წელის მასაჟი ან უბრალოდ პარტნიორის ხელის დაჭერა.

მნიშვნელოვანია, მამაკაცმა იცოდეს, რომ ყველა ქალს ერთნაირი დახმარება არ სჭირდება.

ერთ მომენტში მეუღლეს შეიძლება მასაჟი სურდეს, მეორე მომენტში კი შეხებაც არ სიამოვნებდეს. ამიტომ პარტნიორი ყურადღებით უნდა უსმენდეს მის სურვილებს და საჭიროების შემთხვევაში დახმარების ფორმას ცვლიდეს.

6. მშობიარობა ემოციურად რთული სანახაობაც შეიძლება იყოს

მშობიარობა ბუნებრივი ფიზიოლოგიური პროცესია, თუმცა მას თან ახლავს ისეთი მოვლენებიც, რომელთა ნახვაც მოუმზადებელი ადამიანისთვის შესაძლოა რთული აღმოჩნდეს.

თუ მამაკაცს სისხლის დანახვაზე გული მისდის ან სამედიცინო პროცედურების მიმართ ძლიერი შიში აქვს, პარტნიორულ მშობიარობაზე დასწრების გადაწყვეტილება განსაკუთრებით კარგად უნდა გაიაზროს.

ამასთან, ყველა მშობიარობა ინდივიდუალურად მიმდინარეობს. ზოგჯერ შეიძლება გაუთვალისწინებელი ვითარება შეიქმნას და სამედიცინო პერსონალს სწრაფი მოქმედება დასჭირდეს.

ასეთ დროს პარტნიორისგან სიმშვიდე და თავშეკავებაა საჭირო. პანიკა, ხმამაღალი კამათი ან სამედიცინო პერსონალთან დაპირისპირება ქალს ვერ დაეხმარება. პირიქით, შესაძლოა, მისი შფოთვა კიდევ უფრო გააძლიეროს.

ამიტომ მამაკაცისთვის მნიშვნელოვანია სტრესულ სიტუაციაში საკუთარი ემოციების მართვის უნარი.

აუცილებელია თუ არა მამაკაცის დასწრება მშობიარობაზე?

პარტნიორული მშობიარობა წყვილის ერთობლივი, გააზრებული გადაწყვეტილება უნდა იყოს. განსაკუთრებით მნიშვნელოვანია თავად ქალის სურვილი და კომფორტი.

ზოგიერთ ქალს მეუღლის გვერდით ყოფნა სიმშვიდესა და თავდაჯერებას მატებს, სხვებს კი ურჩევნიათ, მშობიარობის დროს მხოლოდ სამედიცინო პერსონალი ახლდეთ.

ასევე მნიშვნელოვანია მამაკაცის ფსიქოლოგიური მზადყოფნაც. მხოლოდ იმიტომ, რომ პარტნიორული მშობიარობა პოპულარულია, მეუღლემ საკუთარი თავი დასწრებას არ უნდა აიძულოს.

მთავარი ის არ არის, მამაკაცი აუცილებლად სამშობიარო ბლოკში იმყოფებოდეს. მთავარია, წყვილმა წინასწარ იცოდეს, რა სურს თითოეულ მათგანს და როგორ შეუძლიათ ამ მნიშვნელოვან მომენტში ერთმანეთის მხარდაჭერა.

თუ მამაკაცი მშობიარობაზე დასწრებას გადაწყვეტს, მას უნდა ესმოდეს, რომ მისი როლი მხოლოდ ბავშვის დაბადების მოწმე ყოფნა არ არის. ის მეუღლის მხარდამჭერია, რომლის სიმშვიდემ, ყურადღებამ და მზრუნველობამ შესაძლოა მშობიარობის რთული საათები ქალისთვის უფრო ადვილად გადასატანი გახადოს.