დაკარგული 17 წლის ბიჭი, რომელსაც ავსტრალიის ტყეში 6 დღე-ღამე ეძებდნენ, ცოცხალი იპოვეს - სასწაულებრივი გადარჩენის კადრები - მშობლები
დაკარგული 17 წლის ბიჭი, რომელსაც ავსტრალიის ტყეში 6 დღე-ღამე ეძებდნენ, ცოცხალი იპოვეს - სასწაულებრივი გადარჩენის კადრები
17 წლის უილიამი მეგობართან ერთად კემპინგზე იმყოფებოდა. 6 ნოემბერს, ავსტრალიის ქალაქ უოლჰალასთან, ტყეში გაუჩინარდა. მას ბანაკიდან მცირე მანძილზე წასვლა მოუწია დამატებითი ნივთების წამოსაღებად, თუმცა უკან ვეღარ დაბრუნდა.მისი მობილური ტელეფონი, საკვები და წყალი ბანაკში დარჩა...
ბიჭის გაუჩინარების შემდეგ მასშტაბური სამძებრო ოპერაცია დაიწყო, რომელშიც 100-ზე მეტი მაშველი, პოლიციელი, სამძებრო ძაღლები და ვერტმფრენები მონაწილეობდნენ.
უილიამს ტყეში ექვსი დღის განმავლობაში მოუწია გადარჩენისთვის ბრძოლა. როგორც მოგვიანებით თქვა, თავდაპირველად თან ჰქონდა მხოლოდ ერთი დიდი შეკვრა ჩიფსი, რომელიც დაახლოებით ორ დღეზე გადაანაწილა. სასმელ წყალს კი ახლომდებარე ნაკადულიდან იღებდა.
ცივი ღამეების გადასატანად ბიჭი პირსახოცებსა და ბალიშს იყენებდა. დღის სიცხემ და მზემ სხეულზე დამწვრობებიც დაუტოვა.განსაკუთრებით რთული მომენტი მაშინ დადგა, როდესაც უილიამი ციცაბო ფერდობიდან ხევში ჩავარდა, ფეხები დაიზიანა და გადაადგილება გაუჭირდა. საბოლოოდ, ერთ ადგილას დარჩენა და მაშველების ლოდინი გადაწყვიტა.
გადამწყვეტი აღმოჩნდა 12 ნოემბერი.სამაშველო ვერტმფრენის ეკიპაჟმა ტყეში სათევზაო აღჭურვილობის ყუთი შენიშნა, რამაც მათი ყურადღება მიიპყრო. ტერიტორიის დათვალიერებისას მათ ახლომდებარე ნაკადულთან კლდეზე მწოლიარე უილიამი აღმოაჩინეს.
ბიჭმა ვერტმფრენის ხმა გაიგონა, მაშველებს ხელი დაუქნია და სიხარულისგან მუშტიც აღმართა. მაშველებმა ის ვერტმფრენით უსაფრთხო ადგილზე გადაიყვანეს, სადაც დედას შეხვდა.
დედა, ელიზაბეთ ბარკლი, მთელი ამ ხნის განმავლობაში შვილის დაბრუნების იმედს არ კარგავდა. მათი შეხვედრა ძალიან ემოციური აღმოჩნდა.
უილიამი საავადმყოფოში გადაიყვანეს. მას გაუწყლოება, მზის დამწვრობა და ფეხებზე ნაკაწრები აღენიშნებოდა. ექიმების მეთვალყურეობის ქვეშ მისი მდგომარეობა სტაბილური იყო, თუმცა შემდგომი გამოკვლევებიც გახდა საჭირო.
საავადმყოფოდან მიცემულ ინტერვიუში უილიამმა გაიხსენა, რომ ღამით შიშის დასაძლევად ჯონ დენვერის სიმღერას Take Me Home, Country Roads მღეროდა.
მისმა გადარჩენამ ავსტრალიაში დიდი გამოხმაურება გამოიწვია. დედამ კი ხუმრობით თქვა, რომ შვილს ტყეში კემპინგზე წასვლა აღარასოდეს მოუწევს.
დედამ ისიც აღნიშნა უილიამის ძიების დროს, რომ მას აუტიზმის სპექტრის აშლილობა აქვს, მე-2 დონის. დედის თქმით, უილიამს ასევე აქვს შფოთვა, უჭირს უცნობ გარემოში ორიენტირება და ტყეში ყოფნის გამოცდილებაც არ ჰქონდა. დედა შიშობდა, რომ დაკარგვის შემდეგ ბიჭი ძლიერ სტრესსა და პანიკას განიცდიდა.
- ეს ამბავი კიდევ ერთხელ გვახსენებს, რამდენად მნიშვნელოვანია ბუნებაში ყოფნისას უსაფრთხოების წესების დაცვა და საგანგებო სიტუაციებისთვის მზადყოფნა.
