"ზედა კიდურები, თავთან ახლოს, სახესთან - ბევრად უფრო საშიშია" - რა უნდა გავითვალისწინოთ, თუ ადამიანი ძაღლმა დაკბინა ან გაკაწრა - მშობლები
"ზედა კიდურები, თავთან ახლოს, სახესთან - ბევრად უფრო საშიშია" - რა უნდა იცოდეთ აუცილებლად, თუ ადამიანი ძაღლმა დაკბინა ან გაკაწრა
რით განსხვავდება კბენა და გაკაწვრა ერთმანეთისგან და რამდენად რეალურია ცოფის საშიშროება ასეთ დროს, ასევე რამდენად აქვს მნიშვნელობა, ძაღლი ადამიანს სხეულის რა ზონაზე დაკბენს - თემაზე პოდკასტში "ოთარი ექიმო" ვეტერინარი კესო კერესელიძე საუბრობს:
- გააჩნია. ცოფთან დაკავშირებით, თუ დაკბენა მოხდა, პირველ რიგში, ვნახულობთ პასპორტს და ვამოწმებთ, ცხოველი აცრილი არის თუ არა. ამის შემდგომ კონსულტაციაზე რაბიოლოგთან მივდივართ. ამ საკითხში კომპეტენტური სწორედ რაბიოლოგია. ქუჩის ცხოველთან დაკავშირებით კი, როდესაც არ ვიცით, აცრილი არის თუ არა, უმეტეს შემთხვევაში გადაწყვეტილებას მაინც რაბიოლოგი იღებს, რომ ბავშვი იქნება თუ ზრდასრული, აუცილებლად უნდა აიცრას.
გაკაწვრის შემთხვევაშიც, ასაცრელია თუ არა, მაინც რაბიოლოგმა უნდა გადაწყვიტოს. თუმცა, ცოფი მხოლოდ კბენით გადადის. ამასთან, ცხოველი აუცილებლად დაინფიცირებული უნდა იყოს, ანუ მას ცოფი უნდა სჭირდეს. უბრალოდ აუცრელმა ძაღლმაც რომ გვიკბინოს, აუცილებელი არ არის, რომ ცოფი გადაგვედოს. თვითონ ცხოველი უნდა იყოს ცოფით დაავადებული.
რაბიოლოგთან ვიზიტს ალტერნატივა არ აქვს, რადგან ეს მისი კომპეტენციაა. სწორედ ამიტომ არის ვაქცინაცია მნიშვნელოვანი. როდესაც ცხოველი ცოფსა და კომპლექსურზე აცრილია, რაბიოლოგი ვაქცინაციას პირდაპირ არ იწყებს. ის ცხოველს 10 დღის განმავლობაში აკვირდება. თუ ცხოველი ჯანმრთელია, არ დაიღუპება, ცოცხალი რჩება და დაკვირვების ქვეშ იმყოფება, ექიმი ვაქცინაციის ჩატარებას აღარ გადაწყვეტს.
- დრო რამდენი გვაქვს? მართალია, რომ დაკვირვებისთვის დრო 10 დღეა, ანუ 10 დღეში დაავადება არ დაგვემართება? ხშირად ელოდებიან ხოლმე, ძაღლი წყალს თუ სვამს ან თავს როგორ ინახავს - ამაზეცაა დამოკიდებული? რაბიოლოგი ხშირად ამბობს ხოლმე, რომ ჯერ ძაღლს დავაკვირდეთ. თუ ეს ძაღლი ხელმისაწვდომია...
- ამას მხოლოდ მაშინ ამბობს, თუ ძაღლი აცრილია. როდესაც ჩვენ იმის საშუალება გვაქვს, რომ ძაღლს დავაკვირდეთ, ანუ, ეს ძაღლი არ გაგვექცევა, პატრონიანია, ყოველ დღე თუ ვხედავთ, სიმპტომების გამოვლინებიდან, აგრესიის გამოხატვიდან 8-10 დღეში უმეტეს შემთხვევაში ცხოველი იღუპება. სწორედ ამიტომ არის ეს 10 დღე დაკვირვების პერიოდად გამოყოფილი. თუმცა, კიდევ ერთხელ ვიმეორებ, ცოფის საწინააღმდეგო ვაქცინის გამოყენების დაწყება უშუალოდ რაბიოლოგმა უნდა გადაწყვიტოს.
- დადორბვლა ხომ შეიძლება საშიში იყოს, თუკი კანი დაზიანებულია?
- რა თქმა უნდა, თუ კანი დაზიანებულია. თანაც, მნიშვნელობა აქვს, ნაკბენი სად არის. ზედა კიდურები უფრო საშიშია. ფეხზე დაკვირვებისთვის უფრო დიდი დრო გაქვს, ხოლო ზედა კიდურები, თავთან ახლოს, სახესთან - ბევრად უფრო საშიშია. უფრო მალე ვრცელდება, რადგან ნეიროინფექციაა. ამ შემთხვევაში არც აკვირდებიან და არც აცდიან ამ 10 დღეს. ამიტომ არის, რომ ყველა ეს შემთხვევა აბსოლუტურად ინდივიდუალურია.
