რატომ შეიძლება პირველადი შედეგებით მიღებული ქულა საბოლოო პასუხი არ იყოს - როგორ განისაზღვრება გამსვლელი ზღვარი ეროვნულ გამოცდებზე და როგორია 2025 წლის სტატისტიკა - მშობლები
როგორ განისაზღვრება გამსვლელი ზღვარი ეროვნულ გამოცდებზე და რატომ შეიძლება პირველადი შედეგებით მიღებული ქულა საბოლოო პასუხი არ იყოს?
ერთიანი ეროვნული გამოცდების პირველადი შედეგების გამოქვეყნების შემდეგ აბიტურიენტების ერთ-ერთი მთავარი კითხვა ხდება - გადალახა თუ არა მან მინიმალური კომპეტენციის ზღვარი.
დაბნეულობას ხშირად იწვევს ის ფაქტი, რომ პირველადი შედეგების ცხრილში ნაჩვენები ქულა და საბოლოო, გათანაბრებული შედეგი ერთმანეთისგან განსხვავდება. შესაბამისად, ზღვართან ახლოს მყოფი შედეგის შემთხვევაში მხოლოდ პირველადი ქულის მიხედვით საბოლოო გადაწყვეტილების მიღება ყოველთვის შეუძლებელია.
რას ნიშნავს "გამსვლელი ქულა"
თითოეულ საგანში არსებობს მინიმალური კომპეტენციის ზღვარი, რომელიც აბიტურიენტმა უნდა გადალახოს. ეს ზღვარი სხვადასხვა საგანში განსხვავებულია.
მაგალითად:
- ქართულ ენასა და ლიტერატურაში ბარიერი არის 15 ქულაზე მეტი;
- მათემატიკაში ბარიერი არის 10.2 ქულაზე მეტი;
- ისტორიაში - 15 ქულაზე მეტი;
- უცხოურ ენაში 14 ქულაზე მეტი.
ამ ეტაპზე აბიტურიენტებმა მიიღეს ე.წ. ნედლი ქულა. როგორც შეფასებისა და გამოცდების ეროვნულ ცენტრში განგვიცხადეს, თუ აღნიშნულია, რომ, მაგალითად, ბარიერი 15 ქულაზე მეტია, ეს ნიშნავს, რომ გამსვლელი ქულა 16-ია. თუ აღნიშნულია, რომ ბარიერი 10.2-ზე მეტია, გამსვლელი ქულა 11-ია და ასე შემდეგ.
თუმცა, ეს მონაცემები შესაძლოა, შეიცვალოს.
რატომ შეიძლება, შეიცვალოს ქულა გათანაბრების შემდეგ
ერთიანი ეროვნული გამოცდების დროს აბიტურიენტები სხვადასხვა ვარიანტს წერენ. სხვადასხვა ვარიანტს შესაძლოა, განსხვავებული სირთულის დონე ჰქონდეს, რის გამოც მიღებული ქულები პირდაპირი შედარებისთვის ყოველთვის საკმარისი არ არის.
სწორედ ამისთვის გამოიყენება ქულათა გათანაბრების მექანიზმი.
გათანაბრების შედეგად შესაძლოა, შეიცვალოს როგორც აბიტურიენტის საბოლოო ქულა, ისე ის მინიმალური ნედლი ქულა, რომელიც კონკრეტულ ვარიანტში ბარიერის გადალახვას შეესაბამება.
მაგალითად, თუ აბიტურიენტს ქართულ ენასა და ლიტერატურაში პირველადი შედეგით აქვს 15 ქულა, ამ ეტაპზე მას ჯერ არ ეთვლება ბარიერი გადალახულად, რადგან მოთხოვნაა 15-ზე მეტი.
თუმცა, გათანაბრების შედეგად შესაძლებელია მისი საბოლოო ქულა გახდეს 15-ზე მეტი. ასეთ შემთხვევაში აბიტურიენტი მინიმალურ კომპეტენციის ზღვარს გადალახავს. ამავდროულად, ვარიანტების მიხედვით, შესაძლოა, გამსვლელი ქულა შეიცვალოს.
საკითხის უკეთ აღსაქმელად, გაგიზიარებთ 2025 წლის ერთიანი ეროვნული გამოცდების სტატისტიკურ ანალიზს საგნების მიხედვით.
2025 წელს გამსვლელი ნედლი ქულა ვარიანტების მიხედვით ქართულ ენასა და ლიტერატურაში ასე განაწილდა:
- I ვარიანტი - 16 ქულა;
- II ვარიანტი - 14 ქულა;
- III ვარიანტი - 12 ქულა;
- IV ვარიანტი - 13 ქულა;
- V ვარიანტი - 16 ქულა.
ეს ნიშნავს, რომ მაგალითად, ერთ ვარიანტში აბიტურიენტს ბარიერის გადასალახად 12 ქულა სჭირდებოდა, სხვა ვარიანტში კი - 16. ეს განსხვავება ტესტების სირთულის გათვალისწინებით, გათანაბრების პროცესის შედეგია.
ინგლისური ენა
2025 წელს ვარიანტების მიხედვით გამსვლელი ნედლი ქულები შემდეგნაირად განაწილდა:
- I ვარიანტი - 14 ქულა;
- II ვარიანტი - 13 ქულა;
- III ვარიანტი - 15 ქულა;
- IV ვარიანტი - 14 ქულა;
- V ვარიანტი - 15 ქულა.
მათემატიკა
2025 წლის სტატისტიკური ანალიზის მიხედვით, ვარიანტების მიხედვით გამსვლელი ნედლი ქულები ასეთი იყო:
- I ვარიანტი - 11 ქულა;
- II ვარიანტი - 10 ქულა;
- III ვარიანტი - 11 ქულა.
ისტორია
2025 წლის მონაცემებით, ვარიანტების მიხედვით გამსვლელი ნედლი ქულები შემდეგნაირად განაწილდა:
- I ვარიანტი - 12 ქულა;
- II ვარიანტი - 16 ქულა;
- III ვარიანტი - 12 ქულა;
- IV ვარიანტი - 16 ქულა.
ვრცლად თითოეული საგნისა და ვარიანტის მიხედვით, 2025 წლის ერთიანი ეროვნული გამოცდების გამსვლელი ქულები შეგიძლიათ, ბმულზე ნახოთ.
აპელაციის შედეგებთან ერთად, აბიტურიენტები მიიღებენ გათანაბრებული და სკალირებული ქულების შესახებ ინფორმაციას. თუ ამ ეტაპზე ბარიერი ვერ გადალახეთ, მაგრამ გათანაბრებული ქულის გასწვრივ, სკალირებული ქულაც გამოჩნდება, ეს ნიშნავს, რომ კონკურსში მონაწილეობას აგრძელებთ. უნივერსიტეტებისა და პროგრამების დალაგება მეორე დღის 18:00 საათამდე შეგიძლიათ.
აპელაციის შესახებ ინფორმაციას მას შემდეგ გაეცნობით, რაც შეფასებისა და გამოცდების ეროვნული ცენტრი ყველა საგანში პირველად შედეგებს გამოაქვეყნებს.
მთავარი, რაც აბიტურიენტმა უნდა იცოდეს
პირველადი შედეგი ყოველთვის არ არის საბოლოო პასუხი. განსაკუთრებით იმ შემთხვევაში, როდესაც აბიტურიენტის ქულა ზღვართან ახლოსაა, გადამწყვეტი მნიშვნელობა აქვს აპელაციის დასრულების შემდეგ გამოქვეყნებულ გათანაბრებულ და სკალირებულ შედეგებს.
სწორედ საბოლოო შედეგები აჩვენებს, გადალახა თუ არა აბიტურიენტმა მინიმალური კომპეტენციის ზღვარი და მონაწილეობს თუ არა უნივერსიტეტში ჩარიცხვის კონკურსში.
თამარ იაკობაშვილი
