ახალგაცნობილ ადამიანთან საუბარი ყოველთვის მარტივად არ მიდის. რამდენიმე წინადადების შემდეგ შეიძლება მოულოდნელად სიჩუმე ჩამოვარდეს და ორივე მხარემ დაიწყოს ფიქრი — ახლა რა ვთქვა? ახლობელ ადამიანთან ასეთი პაუზა იშვიათად გვაწუხებს: შეგვიძლია გავიცინოთ, რაღაც ვკითხოთ ან უბრალოდ ცოტა ხნით გავჩუმდეთ. უცხო ადამიანთან კი სიჩუმე ხშირად უხერხულობის განცდას ქმნის.

სინამდვილეში საუბრის გასაგრძელებლად განსაკუთრებული მჭევრმეტყველება საჭირო არ არის. არსებობს მარტივი და ნეიტრალური ფრაზები, რომლებიც თანამოსაუბრეს უხერხულ მდგომარეობაში არ აყენებს და ახალი თემის პოვნაშიც გვეხმარება.

1. „მე აქ პირველად ვარ. თქვენ?“

ან პირიქით: „მე აქ ხშირად დავდივარ. თქვენ?“

ეს ნეიტრალური კითხვაა, რომლის დასმაც თითქმის ნებისმიერ სიტუაციაში შეიძლება.

თანამოსაუბრის პასუხი თავად მიგანიშნებთ, როგორ გააგრძელოთ საუბარი. მაგალითად, თუ სივრცეს კარგად იცნობთ, ხოლო ის პირველად არის იქ, შეგიძლიათ პატარა ექსკურსიაც კი მოუწყოთ. თუ თქვენ პირველად მოხვდით ბარში, სადაც ის ხშირად დადის, შეგიძლიათ ჰკითხოთ, რომელი სასმელის გასინჯვას გირჩევთ.

ხოლო თუ ორივე პირველად ხართ ამ ადგილას, გარემოს გაცნობაც ერთად შეგიძლიათ.

2. „ლამაზი ადგილია, არა?“

ეს წინა კითხვის კიდევ ერთი ვარიანტია. შეგიძლიათ ყურადღება ნებისმიერ რამეზე გაამახვილოთ, რასაც ირგვლივ ხედავთ: „რა საოცარი ყვავილებია“, „რა საინტერესო აკვარიუმია“, „რა სასიამოვნო ნამცხვრის სუნია“.

შემდეგ შეგიძლიათ თანამოსაუბრეს ჰკითხოთ, თავად რა მოსწონს ამ ადგილას და შთაბეჭდილებები ერთმანეთს გაუზიაროთ.

რაც შეეხება იმას, რაც გაღიზიანებთ ან არ მოგწონთ, ამაზე საუბრის დაწყება ყოველთვის მიზანშეწონილი არ არის. თუმცა ზოგჯერ უარყოფითი შთაბეჭდილებაც აახლოებს ადამიანებს. ამიტომ, თუ თანამოსაუბრე თავად დაიწყებს საუბარს იმაზე, რაც არ მოსწონს, შეგიძლიათ საუბარი გააგრძელოთ.

3. „შეიძლება ადრე შევხვედრივართ? ხომ არ ყოფილხართ...?“

შემდეგ შეგიძლიათ დაასახელოთ ადგილი ან ღონისძიება, სადაც ამ ადამიანის საქმიანობისა და ინტერესების გათვალისწინებით ნამდვილად შეიძლებოდა ერთმანეთს შეხვედროდით.

მაგალითად, თუ ერთ სფეროში მუშაობთ, შეგიძლიათ პროფესიული კონფერენცია ახსენოთ. ან რომელიმე კონცერტი, თუ იქ ნამდვილად იყავით და თანამოსაუბრე ვიღაცას მოგაგონებთ. ასევე შეიძლება გაიხსენოთ პოპულარული დასასვენებელი ადგილი, რომელსაც ხშირად სტუმრობთ.

თუ აღმოჩნდა, რომ მართლაც შეხვედრილხართ, სასაუბრო თემაც თავისთავად გაჩნდება. თუ არა — შეგიძლიათ უფრო დაწვრილებით მოჰყვეთ თქვენ მიერ ნახსენები ღონისძიების ან ადგილის შესახებ და შემდეგ საყვარელ ადგილებზე, საინტერესო მოვლენებსა თუ სხვა ინტერესებზე გადახვიდეთ.

4. „რას ფიქრობთ... ?“

წინა ვარიანტისგან განსხვავებით, ამ შემთხვევაში კითხვა შემთხვევით არ უნდა დასვათ — შეარჩიეთ საკითხი, რომლის შესახებაც თანამოსაუბრემ ნამდვილად იცის.

მაგალითად: „როგორ მოგეწონათ პრეზენტაცია? მე მომეჩვენა, რომ ბევრი საინტერესო იდეა იყო. თქვენ რას ფიქრობთ?“ ან: „როგორ მოგეწონათ გამოფენა?“

მოუსმინეთ პასუხს. შეგიძლიათ დაეთანხმოთ ან აუხსნათ, რატომ გაქვთ განსხვავებული მოსაზრება. ორივე შემთხვევაში საუბრის თემა უკვე გაქვთ.

თუმცა თუ ადამიანი ძალიან მოკლედ გპასუხობთ ან საერთოდ არ ცდილობს საუბრის გაგრძელებას, შესაძლოა მას ურთიერთობის გაგრძელება არ სურდეს. ასეთ შემთხვევაში უმჯობესია თავაზიანად დაემშვიდობოთ.

5. „რა ორიგინალური სამკაული გაქვთ!“

შეგიძლიათ ნებისმიერი სხვა შესაფერისი კომპლიმენტიც გამოიყენოთ. ეს განსაკუთრებით გამოგადგებათ გაცნობისთანავე, როდესაც ერთმანეთის სახელები უკვე იცით, მაგრამ საერთო სასაუბრო თემა ჯერ ვერ იპოვეთ.

ადამიანისთვის სასიამოვნო რამის თქმა კონტაქტის დამყარების კარგი საშუალებაა.

თუმცა კომპლიმენტი ზედმეტად პირადული ან ორაზროვანი არ უნდა იყოს და არც თანამოსაუბრის გარეგნობის თავისებურებებს უნდა შეეხებოდეს. შეგიძლიათ ყურადღება მიაქციოთ დეტალს, რომელიც ადამიანის გემოვნებაზე მიუთითებს — საათს, ჩანთას, გულსაბნევს ან სხვა აქსესუარს.

6. „უფრო დაწვრილებით მომიყევით თქვენი პროფესიის შესახებ. ყოველთვის მაინტერესებდა...“

შემდეგ დააზუსტეთ, კონკრეტულად რისი გაგება გსურთ. უმჯობესია ისეთი რამ ჰკითხოთ, რაც ზედაპირული და ძალიან აშკარა არ არის.

მაგალითად, მასწავლებელს შეგიძლიათ ჰკითხოთ, იღლება თუ არა შესვენებებზე ხმაურისგან და როგორ უმკლავდება მას. დიზაინერს — აუცილებელია თუ არა მის პროფესიაში ტრადიციული მასალებით ხატვის ცოდნა და რამდენად გამოსადეგია ეს უნარი. ბუღალტერს კი შეგიძლიათ ჰკითხოთ, არის თუ არა მის საქმიანობაში ადგილი შემოქმედებითობისთვის.

თუმცა პირველივე წუთებში ზედმეტად პირად კითხვებს მოერიდეთ. მაგალითად, კითხვა — „ყველაზე მეტად რა მოგწონთ თქვენს სამსახურში?“ — უკვე უფრო პირად და ვრცელ პასუხს მოითხოვს და ყველას არ სურს ამის შესახებ უცნობთან საუბარი ან ამის დრო იმ სიტუაციაში არ არს.

თუ ერთი პროფესია გაქვთ, შეგიძლიათ თქვენთვის ორივესთვის ნაცნობ სამუშაო დეტალებზე ისაუბროთ.

7. „ამ თემაზე რის წაკითხვას მირჩევთ?“

ასევე შეგიძლიათ ჰკითხოთ, რას გირჩევთ სანახავად, მოსასმენად ან სად გირჩევთ წასვლას.

ეს ფრაზა განსაკუთრებით გამოგადგებათ თემატურ ღონისძიებაზე ხართ.

რჩევის თხოვნაც კონტაქტის დამყარების კარგი საშუალებაა. ამით აჩვენებთ, რომ პატივს სცემთ ადამიანის აზრს და მის გამოცდილებას აფასებთ. ამასთან, საუბარი თქვენთვისაც შეიძლება სასარგებლო აღმოჩნდეს — შესაძლოა თქვენთვის საინტერესო თემაზე რაიმე ახალი აღმოაჩინოთ.

საპასუხოდ თქვენც შეგიძლიათ გაუზიაროთ თანამოსაუბრეს სასარგებლო რესურსები ან საინტერესო ადგილები.

8. „როგორ ფიქრობთ, კიდევ რა გველოდება დღეს?“

ასეთი კითხვა ნებისმიერ საჯარო ღონისძიებაზე გამოგადგებათ — პრეზენტაციაზე, კონფერენციაზე, ტრენინგზე, პოპულარულ შოუზე თუ მოდის ჩვენებაზე.

თუ ორივე იქ ხართ, სავარაუდოდ, ორივეს გაინტერესებთ, როგორ გაგრძელდება ღონისძიება.

მოუსმინეთ თანამოსაუბრის ვარაუდს და შეგიძლიათ ჰკითხოთ, რატომ ფიქრობს ასე. ამით მის მოსაზრებასთან ინტერესს გამოხატავთ და საუბრის გასაგრძელებელ თემასაც იპოვით.

მოგვიანებით, თუ ორივეს სურვილი გექნებათ, შეგიძლიათ თქვენი ვარაუდები რეალობას შეადაროთ და კვლავ განიხილოთ.

9. „ჩვეულებრივ როგორ არჩევთ, სად წახვიდეთ ან რას უყუროთ?“

ეს კითხვაც არ მოითხოვს ადამიანისგან ზედმეტ გულახდილობას და პირად სივრცეში შეჭრას.

იმისთვის, რომ თანამოსაუბრემ უხერხულობა არ იგრძნოს, შეგიძლიათ ჯერ საკუთარი გამოცდილება გაუზიაროთ. მაგალითად: „რამდენიმე თემატურ არხს ვადევნებ თვალს, სადაც ახალი კაფეების, პრემიერებისა და კონცერტების შესახებ ბევრი ინფორმაციაა. თქვენ როგორ იგებთ სიახლეებს?“

შესაძლოა აღმოაჩინოთ, რომ ერთსა და იმავე რესურსებს იყენებთ — ეს უკვე საერთო ინტერესის პოვნის კარგი შესაძლებლობაა. თუ არა, შეგიძლიათ ერთმანეთს საინტერესო წყაროები გაუზიაროთ.

10. „თქვენ საიდან იცნობთ მასპინძელს (სახელი)?“

ეს კითხვა განსაკუთრებით გამოგადგებათ წვეულებაზე, ქორწილში, დაბადების დღეზე ან სხვა შეკრებაზე, სადაც ადამიანების ნაწილი ერთმანეთს საერთოდ არ იცნობს.

კითხვა მარტივია, მაგრამ პასუხმა შეიძლება საუბრის არაერთი ახალი თემა წარმოშვას. შესაძლოა გაირკვეს, რომ თანამოსაუბრე მასპინძლის ბავშვობის მეგობარია, ყოფილი თანამშრომელი, ნათესავი ან უნივერსიტეტიდან იცნობს. ამის შემდეგ საუბრის გაგრძელებაც ბევრად მარტივია — შეგიძლიათ ჰკითხოთ, რამდენი ხანია იცნობენ ერთმანეთს, სად გაიცნეს ერთმანეთი ან თავადაც მოუყვეთ, საიდან იცნობთ მასპინძელს.

ამ კითხვის უპირატესობა ისიცაა, რომ უკვე გყავთ საერთო ადამიანი, რომელზეც საუბარი შეგიძლიათ და უხერხული პაუზის დასასრულებლად ახალი თემის ხელოვნურად მოფიქრება აღარ გჭირდებათ.