პრინც ჰარის მეუღლის, მეგან მარკლის ოჯახი ახალი სკანდალის ცენტრში აღმოჩნდა. მას შემდეგ, რაც მეგანის მამასთან დაკავშირებულ ნივთებში ბავშვთა სექსუალური ძალადობის ამსახველი მასალები აღმოაჩინეს, ფილიპინების სამართალდამცველები გამოძიების ფარგლებში მისი ნახევარძმითაც დაინტერესდნენ. განსაკუთრებით მოულოდნელი ის არის, რომ სწორედ თომას მარკლ-უმცროსმა შეატყობინა პოლიციას საეჭვო მასალების არსებობის შესახებ.

მეგან მარკლისა და მისი ოჯახის დაპირისპირება წლებია საერთაშორისო მედიის ყურადღების ცენტრშია. თუმცა აქამდე კონფლიქტი ძირითადად საჯარო განცხადებებს, ურთიერთბრალდებებს, სკანდალურ ინტერვიუებსა და სასამართლო დავებს უკავშირდებოდა. ამჯერად საქმე გაცილებით მძიმეა – მიმდინარეობს გამოძიება არასრულწლოვანთა სექსუალური ძალადობის ამსახველი მასალების სავარაუდო ფლობისა და მათთან დაკავშირებული სხვა შესაძლო დანაშაულების შესახებ.

რა აღმოაჩინეს მეგან მარკლის მამის ნივთებში?

საქმე 2026 წლის ოქტომბერში გახმაურდა, თუმცა საეჭვო მასალების აღმოჩენის ისტორია რამდენიმე თვით ადრე დაიწყო.

გავრცელებული ინფორმაციით, მეგან მარკლის 60 წლის ნახევარძმა, თომას მარკლ-უმცროსი, ფილიპინების ქალაქ სებუში მამის ძველ ნივთებს ათვალიერებდა, როდესაც ელექტრონულ მოწყობილობებსა და მეხსიერების ბარათებზე შემაშფოთებელ მასალებს წააწყდა.

მისი მონათხრობით, თავდაპირველად მხოლოდ ძველ ტელეფონს ეძებდა, თუმცა რამდენიმე ყუთში აღმოაჩინა კომპიუტერული ტექნიკა, ტელეფონები, ფოტოები და ვიდეოჩანაწერები.

თომას მარკლ-უმცროსი ამტკიცებდა, რომ მოწყობილობებში არასრულწლოვანთა სექსუალური ძალადობის ამსახველი მასალები ნახა. მისი თქმით, აღმოჩენამ იმდენად შეძრა, რომ გადაწყვიტა, ინფორმაცია სამართალდამცველებისთვის გადაეცა.

მასალები ფილიპინების პოლიციას მიაწოდეს, საქმეში კი აშშ-ის გამოძიების ფედერალური ბიუროც ჩაერთო.

ფილიპინების პოლიციის ცნობით, პირველადი ექსპერტიზის შედეგად რამდენიმე მეხსიერების ბარათსა და ტელეფონში მართლაც აღმოჩნდა ბავშვთა სექსუალური ძალადობის ამსახველი მასალები.

გამოძიებამ 7 500-მდე ფოტო და ვიდეომასალა გამოავლინა

სამართალდამცველებმა დაახლოებით 7 500 ფოტო და ერთი ვიდეო აღმოაჩინეს.

მასალებში არასრულწლოვანი გოგონები და ბიჭები ფიგურირებენ. ოფიციალური პირების ინფორმაციით, ზოგიერთი ბავშვი დაახლოებით 10–11 წლის ჩანს.

გამოძიება ცდილობს დაადგინოს, ვის ეკუთვნოდა ელექტრონული მოწყობილობები, ვინ ინახავდა მასალებს და ხომ არ უკავშირდება საქმე არასრულწლოვანთა ექსპლუატაციის უფრო მეტ შემთხვევას.

თომას მარკლ-უფროსი, რომელიც ამჟამად 82 წლისაა, ბრალდებებს კატეგორიულად უარყოფს. მისი მტკიცებით, მას ბავშვთა სექსუალური ძალადობის ამსახველი მასალები არასოდეს ჰქონია. მან ასევე გამოთქვა ვარაუდი, რომ საეჭვო ფაილები შესაძლოა მის წინააღმდეგ მიზანმიმართულად გამოეყენებინათ.

რატომ დაინტერესდა პოლიცია მეგან მარკლის ძმითაც?

საქმემ მოულოდნელი მიმართულება მიიღო, როდესაც ფილიპინების ხელისუფლებამ განაცხადა, რომ გამოძიების ფარგლებში თომას მარკლ-უმცროსის შესაძლო როლსაც სწავლობდა.

მინისტრ ჯონვიკ რემულიას ინფორმაციით, გამოჩნდნენ მოწმეები, რომლებიც ამტკიცებენ, რომ არასრულწლოვანი გოგონები იმ სახლში მიდიოდნენ, სადაც მეგანის ნახევარძმა ცხოვრობდა.

სამართალდამცველები ამ ჩვენებებს ამოწმებენ და ცდილობენ დაადგინონ, არსებობდა თუ არა კავშირი აღნიშნულ გარემოებებსა და აღმოჩენილ მასალებს შორის.

თომას მარკლ-უმცროსი ამ ეტაპზე გამოძიებისთვის საეჭვო პირად განიხილება და არა ოფიციალურ ეჭვმიტანილად.

მარკლ-უმცროსი ყველაფერს უარყოფს და აცხადებს, რომ მისი ერთადერთი მიზანი საეჭვო მასალების სამართალდამცველებისთვის გადაცემა იყო.

მეგან მარკლის რეაქცია – რატომ არ აძლევდა მამას შვილებთან ურთიერთობის უფლებას?

მამის წინააღმდეგ გავრცელებულ მძიმე ბრალდებებს მეგან მარკლი 23 ოქტომბერს ოფიციალური განცხადებით გამოეხმაურა.

„ღრმად ვარ შეძრული ბოლო 24 საათის განმავლობაში გავრცელებული ინფორმაციით. ჩემი ფიქრები იმ ბავშვებთანაა, რომლებსაც შესაძლოა ზიანი მიადგათ“, – განაცხადა სასექსის ჰერცოგინიამ.

მისი თქმით, მამის შესახებ შემაშფოთებელი ბრალდებები ჯერ კიდევ 2018 წელს გახდა მისთვის ცნობილი.

„2018 წელს ლონდონის პოლიციასა და სამეფო ოჯახის დაცვის სამსახურს წერილი გაეგზავნა, რომელიც მოგვიანებით მეც გადმომცეს. მასში მამაჩემის წინააღმდეგ შემაშფოთებელი ბრალდებები იყო წარმოდგენილი. მაშინ დამარწმუნეს, რომ ამ საკითხს იძიებდნენ“.

მეგანმა განმარტა, რატომ არ ჰქონდა მამამისს ურთიერთობა შვილიშვილებთან – არჩისა და ლილიბეტთან.

„იმედი მაქვს, ახლა მაინც გახდება გასაგები, რომ მამაჩემთან დისტანციის შენარჩუნებასა და მისთვის ჩემს შვილებთან ურთიერთობის აკრძალვას მხოლოდ ერთი მიზეზი ჰქონდა – მათი დაცვა“.

განცხადების ბოლოს მეგანმა იმედი გამოთქვა, რომ საქმეზე სამართლიანობა აღსრულდება და მთავარი პრიორიტეტი ბავშვების უსაფრთხოება იქნება.

მეგან მარკლისა და მამის ურთიერთობა 2018 წელს, პრინც ჰარისთან ქორწილის წინ დაიძაბა. გაირკვა, რომ თომას მარკლი პაპარაცებთან შეთანხმებით დადგმულ ფოტოებს იღებდა და მათ სანაცვლოდ თანხას იღებდა. სკანდალის შემდეგ მან ქორწილში მონაწილეობა ვერ მიიღო, ოფიციალურ მიზეზად კი გულის პრობლემები დასახელდა. მეგანი საკურთხევლისკენ პრინცმა ჩარლზმა მიაცილა. ამის შემდეგ მამა-შვილის ურთიერთობა პრაქტიკულად შეწყდა.

მამისთვის მიწერილი პირადი წერილი, რომელიც სასამართლო დავის მიზეზი გახდა

2018 წლის აგვისტოში მეგანმა მამას ხუთგვერდიანი პირადი წერილი მისწერა, რომელშიც მათი ურთიერთობის გაუარესებაზე საუბრობდა.

წერილის არსებობის შესახებ საზოგადოებამ მოგვიანებით შეიტყო, ხოლო 2019 წელს ბრიტანულმა გამოცემამ The Mail on Sunday მისი მნიშვნელოვანი ნაწყვეტები გამოაქვეყნა.

მეგანმა გამოცემას სასამართლოში უჩივლა და განაცხადა, რომ პირადი მიმოწერის გასაჯაროებით მისი პირადი ცხოვრების ხელშეუხებლობის უფლება დაირღვა.

2021 წელს სასამართლომ მეგანის სასარგებლოდ მიიღო გადაწყვეტილება, რომელიც სააპელაციო სასამართლომაც ძალაში დატოვა.

ამ პროცესმა კიდევ ერთხელ გამოაჩინა, რამდენად ღრმა იყო დაპირისპირება მამასა და ქალიშვილს შორის.

მეგანის ნახევარდა, სამანტა მარკლი, წლების განმავლობაში საჯაროდ აკრიტიკებდა მას. განსაკუთრებით გამწვავდა დაპირისპირება 2021 წელს, ოპრა უინფრისთან მეგანის ინტერვიუს შემდეგ. სამანტამ ნახევარდას ცილისწამებისთვის სასამართლოშიც უჩივლა, თუმცა 2024 წლის მარტში ფლორიდის სასამართლომ მისი სარჩელი არ დააკმაყოფილა.

რა ხდება ახლა?

ფილიპინების სამართალდამცველები განაგრძობენ ამოღებული ელექტრონული მოწყობილობების ექსპერტიზას და ცდილობენ დაადგინონ, ვინ არის პასუხისმგებელი აღმოჩენილი მასალების შენახვასა და შესაძლო გავრცელებაზე.

გამოძიებაში მნიშვნელოვანია როგორც მოწყობილობების მფლობელობის დადგენა, ისე მოწმეების ჩვენებების გადამოწმება.

თომას მარკლ-უფროსი ამჟამად აშშ-ში იმყოფება. გავრცელებული ინფორმაციით, მას ჯანმრთელობის სერიოზული პრობლემები აქვს და სამედიცინო დაწესებულებაში მკურნალობდა.

მამა და შვილი მათ წინააღმდეგ გავრცელებულ ბრალდებებს უარყოფენ.

2026 წლის 6 ნოემბრის მდგომარეობით, საჯაროდ გავრცელებული ინფორმაციით, არც თომას მარკლ-უფროსის და არც თომას მარკლ-უმცროსის ბრალეულობა სასამართლოს არ დაუდგენია. გამოძიება გრძელდება.