"ბრალი წარედგინა მასწავლებელს, რომელიც 7 წლის მოსწავლეზე სისტემატურად სექსუალურად ძალადობდა... და დღემდე ბავშვებთან მუშაობს" - რას წერს "საფარი" - მშობლები

​ერთი წლის წინ, საფარს ახალგაზრდა ქალმა მიმართა. საქმეზე მუშაობა ორგანიზაციის იურისტმა, მარი ვარამაშვილმა დაიწყო. მთელი ამ დროის განმავლობაში, იურისტი დაზარალებულთან ერთად აქტიურად აგროვებდა მტკიცებულებებს. მისი ჩართულობით ჩატარდა ყველა საჭირო საგამოძიებო და საპროცესო მოქმედება, რითაც დაზარალებულის მიერ მოწოდებული ინფორმაცია სრულად დადასტურდა.

​

პროკურატურამ მტკიცებულებათა ერთობლიობის საფუძველზე კაცს ბრალი წარუდგინა. საგანგაშოა გარემოება, რომ ბრალდებულს დღემდე ჰქონდა შეხება ბავშვებთან და ის კერძო პედაგოგიურ საქმიანობასაც ეწევა.

ხვალ, 10 ნოემბერს სასამართლო რისკებს შეაფასებს, აღკვეთის ღონისძიებაზე იმსჯელებს და გადაწყვეტს, შეეფარდება თუ არა ბრალდებულს პატიმრობა.

​საქმეზე გამოძიება გრძელდება."

ამ თემაზე დაწერა ასევე "საფარის" ხელმძღვანელმა, იურისტმა და უფლებადამცველმა ბაია პატარაიამ:

"საქართველოში პირველი პრეცედენტი გვაქვს: ბრალი წარედგინა მასწავლებელს 30 წლის შემდეგ. 7 წლის მოსწავლეზე სისტემატურად ძალადობდა წლების განმავლობაში და დღემდე ბავშვებთან მუშაობს. არ ვარ დარწმუნებული სასამართლოში, რისკებს ვერ ხედავენ ძველ დანაშაულებში, არადა პეფოფილიაზე ვსაუბრობთ და კაცი მუშაობს ისევ ბავშვებთან!!!"

ოფიციალური, სამთავრობო უწყებებიდან რაიმე განცხადება ან კომენტარი ამ თემაზე არ გაკეთებულა.