რა თემები მოვიდა ქართულ ენასა და ლიტერატურაში და რამდენმა აბიტურიენტმა დააგვიანა გამოცდაზე - მშობლები
ერთიანი ეროვნული გამოცდები დაიწყო - პირველი დღის პირველი სესიის თემები ქართულ ენასა და ლიტერატურაში, დაგვიანებული აბიტურიენტები და აუცილებელი წესები
დღეიდან ერთიანი ეროვნული გამოცდები დაიწყო. პირველ გამოცდას აბიტურიენტები ქართულ ენასა და ლიტერატურაში აბარებენ.
პირველი სესიიდან აბიტურიენტები უკვე გამოდიან და სხვადასხვა ჯგუფში ერთმანეთს გამოცდილებას უზიარებენ.
პირველი სესიიდან გამოსული აბიტურიენტები ამბობენ, რომ წერით დავალებად პროგრამული ტექსტებიდან შოთა რუსთაველის "ვეფხისტყაოსანი", კონკრეტულად კი ტარიელის და ავთანდილის შეხვედრის მონაკვეთი მოვიდა. არაპროგრამულიდან - ლევან გოთუას "გმირთა ვარამი".
როგორც აბიტურიენტები წერენ, თეზისები შემდეგი შინაარსის იყო: "გონივრული მოსმენა და რჩევა მხოლოდ გონიერ ადამიანს შეუძლია"; "საერთო ტკივილი მოსისხლე მტრებსაც აერთიანებთ".
შეფასებისა და გამოცდების ეროვნული ცენტრის ინფორმაციით, დღეს ქართული ენისა და ლიტერატურის გამოცდის პირველ სესიაზე განაწილებული აბიტურიენტებიდან გამოცდაზე გამოცხადდა 95%-ზე მეტი გამოსაცდელი.
ამ დროის მონაცემებით დაიგვიანა ორმა აბიტურიენტმა.
მეორე სესიისათვის რეგისტრაცია ყველა საგამოცდო ცენტრში 14:00 საათზე დაიწყება და ერთი საათის განმავლობაში გაგრძელდება.
შეგახსენებთ, რომ ქართულ ენასა და ლიტერატურაში, ერთიან ეროვნულ გამოცდაზე, შემდეგი საკითხები უნდა გაითვალისწინოთ:
- ტესტი შედგება არჩევითპასუხებიანი და ღია დავალებებისაგან;
- არჩევითი პასუხების მქონე დავალებაში დასმულია შეკითხვა და მოცემულია ოთხი სავარაუდო პასუხი, რომელთაგან მხოლოდ ერთია სწორი. სწორი პასუხი ფასდება 1 ქულით;
- არჩევითპასუხებიანი დავალებებით შემოწმდება წაკითხული ტექსტის გააზრების უნარი;
- ღია დავალებების მაქსიმალური ქულა მითითებულია საგამოცდო ტესტში; ეს დავალებები ფასდება წინასწარ შედგენილი შეფასების სქემის მიხედვით. ქართული ენისა და ლიტერატურის ტესტით შემოწმდება:
- ტექსტის რედაქტირების უნარი;
- საგამოცდო პროგრამით გათვალისწინებული და არასაპროგრამო მხატვრული ტექსტების გააზრებისა და ანალიზის უნარი;
- ინფორმაციის გააზრების, ანალიზის, განზოგადებისა და დასკვნის გამოტანის უნარი; დამოუკიდებელი, კრიტიკული აზროვნების უნარი;
- ენის გამომსახველობით საშუალებათა (როგორც ლექსიკურის, ისე გრამატიკულის) ადეკვატური გამოყენების უნარი; წერითი მეტყველების უნარი თანამედროვე სალიტერატურო ენის ნორმების დაცვით.
