„188 საჯარო სკოლამ წელს პირველკლასელი ვერ მიიღო...“ - საქართველოში სკოლები ცარიელდება? საგანგაშო დემოგრაფიული სტატისტიკა ქვეყანაში - მშობლები
„188 საჯარო სკოლამ წელს პირველკლასელი ვერ მიიღო...“ - საქართველოში სკოლები ცარიელდება? საგანგაშო დემოგრაფიული სტატისტიკა ქვეყანაში
"188 საჯარო სკოლამ წელს ვერც ერთი პირველკლასელი ვერ მიიღო. 727 საჯარო სკოლაში შევიდა 5 ან 5-ზე ნაკლები პირველკლასელი“ - ამის შესახებ დემოგრაფმა ლელა მენაბდიშვილმა რადიო „პალიტრას“ გადაცემაში „თქვენი დრო“ განაცხადა. მისი თქმით, ქვეყანაში დემოგრაფიული კოლაფსია და მონაცემები წლიდან წლამდე უარესდება.
„21-ე საუკუნე ქვეყანაში დაიწყო ბუნებრივი კლებით. 2000 – 2007 წლამდე იყო ბუნებრივი კლების პირველი ეტაპი. მეორე ეტაპი დაიწყო 2020 წლიდან და დღემდე გრძელდება. ამ ფონზე კი გვაქვს ოფიციალური სტატისტიკა, რომლის თანახმადაც ქვეყანაში მოსახლეობის რაოდენობა გაიზარდა. ამ დროს ჩნდება სრულიად ლეგიტიმური კითხვა, რანაირად შეიძლება ეს მოხდეს, როდესაც ქვეყანაში ბუნებრივი კლებაა?
ამავე დროს გვაქვს სტატისტიკა, რომლის თანახმადაც, ქვეყნიდან ყოველ წელს გადის სულ უფრო მეტი ქართველი და მათ ადგილს იკავებენ უცხოელები. 2023 წელს ემიგრაციის პიკი იყო, საქართველოდან 73 625 ადამიანი გავიდა და შემოვიდა 34 ათასამდე ადამიანი და უარყოფითი სალდოც დაფიქსირდა. ამავე 2023 წელს, დემოგრაფიის და სოციოლოგიის ინსტიტუტმა ჩაატარა კვლევა - გამოვკითხეთ 2000 ოჯახი საქართველოს ყველა რაიონში და აღმოჩნდა, რომ ყოველი მეოთხე ოჯახში იყო ემიგრაციაში წასული წევრი. ბევრგან კი არამარტო წევრი, არამედ მშობლები და ბავშვებიც წასულები იყვნენ. 0-14 წლამდე 2023 წელს, 35% წავიდა საქართველოდან, 2024 წელს - 10.3%, 2025 წელს - 9%. აღსანიშნავია, რომ ეს ბავშვები მშობლებთან ერთად არიან წასულები და მათი დიდი ნაწილი უკან დაბრუნებას აღარ აპირებს“ - განაცხადა დემოგრაფმა. განაგრძეთ კითხვა
