როგორ უნდა ამოვიცნოთ ინსულტის ნიშნები და რა შეცდომებს ვუშვებთ წნევის გაზომვისას - თამარ დაუსის რეკომენდაციები - მშობლები
როგორ უნდა ამოვიცნოთ ინსულტის ნიშნები და რა შეცდომებს ვუშვებთ წნევის გაზომვისას - თამარ დაუსის რეკომენდაციები
ექთანი თამარ დაუსი გადაცემაში "მარი მალაზონია პირადი ექიმი" საუბრობს, როგორ უნდა ამოვიცნოთ ინსულტის ნიშნები:
- ინსულტის დროს ხშირად დროს ვკარგავთ. ვამბობთ: "აბა, ტილო, ცხელი აბაზანა, შხაპი, მეზობელს ამან უშველა..." ამასობაში დრო გადის. სინამდვილეში კი ტვინი უჟანგბადობის მიმართ ბევრად უფრო მოწყვლადია, რის გამოც დრო ძალიან ცოტა გვაქვს. რას უნდა დავაკვირდეთ და რა უნდა გავაკეთოთ?
არსებობს სამი ძირითადი კომპონენტი, რომლებიც უნდა შევაფასოთ:
- ღიმილი/კბილები: სთხოვეთ ადამიანს, გაიღიმოს ან კბილები გვიჩვენოს. დააკვირდით, ხომ არ არის სახის ასიმეტრია, ანუ ხომ არ ჩამორჩება სახის ერთი მხარე მეორეს.
- ხელების აწევა: სთხოვეთ, თვალები დახუჭოს, ხელები ხელისგულებით ზემოთ ამოაბრუნოს და მაღლა აწიოს. თუ ერთი ხელი ჩამორჩება ან ქვემოთ ეშვება, ეს საგანგაშო ნიშანია.
- მეტყველება: სთხოვეთ მარტივი წინადადების გამეორება, მაგალითად: "გარეთ კარგი ამინდია". თუ სიტყვებს ურევს, ვერ იმეორებს ან გამეორება უჭირს, ეს მესამე საგანგაშო სიმპტომს წარმოადგენს.
ამ ნიშნებიდან თუნდაც ერთის გამოვლენისას, პაციენტი რაც შეიძლება სწრაფად უნდა გადავიყვანოთ საავადმყოფოში.
ამავე გადაცემაში თამარ დაუსი საუბრობს, რა შეცდომებს უშვებენ ადამიანები ყველაზე ხშირად წნევის გაზომვის დროს:
- რაც შეეხება წნევის გაზომვას და იმ შეცდომებს, რომლებსაც ამ დროს ვუშვებთ, ერთ-ერთი ყველაზე გავრცელებული პრობლემა არასწორად შერჩეული მანჟეტია. ოჯახში შესაძლოა, სხვადასხვა აღნაგობის ადამიანი ცხოვრობდეს, წნევას კი ყველას ერთი აპარატით ვუზომავდეთ. აფთიაქებშიც, როგორც წესი, ძირითადად სტანდარტული ზომის მანჟეტები იყიდება. წნევის აპარატის მანჟეტის ზომას გადამწყვეტი მნიშვნელობა აქვს: პატარა მანჟეტი ცრუდ მაღალ მაჩვენებელს აჩვენებს, ხოლო დიდი - ცრუ დაბალს. იმისათვის, რომ მანჟეტი სწორად შევარჩიოთ, რთული სანტიმეტრების დამახსოვრება საჭირო არ არის.
როგორ შევამოწმოთ მანჟეტის ზომა?
მანჟეტი მკლავს კარგად უნდა ეკვროდეს. შეკვრისას ფხრიწიანი ნაწილი არც ზედმეტად გადაფარებული უნდა დარჩეს და არც მხოლოდ ნაწილობრივ ეჭირებოდეს. სიგრძის მიხედვით, მანჟეტი იდაყვიდან იღლიამდე მხრის დაახლოებით ორ მესამედს უნდა ფარავდეს. იგი არც იდაყვზე უნდა გადადიოდეს და არც იღლიის ფოსოში შედიოდეს. ამ წესების დაუცველად გაზომვისას, აპარატი ძირითადად მცდარ მაჩვენებელს გვიჩვენებს.
